Chennai Super kings: రాజస్థాన్‌తో మ్యాచ్‌లో.. రాయుడు ఎందుకు లేడు?

రాజస్థాన్ రాయల్స్‌తో మ్యాచ్‌కు చెన్నై సూపర్ కింగ్స్ జట్టును ప్రకటించగానే అందరూ ఆశ్చర్యపోయారు. ముంబై ఇండియన్స్‌తో జరిగిన మ్యాచ్‌లో అద్భుత హాఫ్ సెంచరీతో చెన్నైను గెలిపించిన రాయుడు ప్లేయింగ్ ఎలెవన్‌లో లేకపోవడంతో షాకయ్యారు. అతడి స్థానంలో కొత్త కుర్రాడు రుతురాజ్‌ గైక్వాడ్‌ను ఎందుకు తీసుకున్నారా? అని ఆలోచించారు. 217 పరుగుల లక్ష్య ఛేదనలో చెన్నై జట్టులో అంబటి రాయుడు లేని లోటు స్పష్టంగా కనిపించింది.

రాయుడి స్థానంలో బ్యాటింగ్‌కు దిగిన రుతురాజ్ గైక్వాడ్ తొలి బంతికే స్టంపౌట్ రూపంలో ఔటై నిరాశపర్చాడు. దీంతో రాయుడెక్కడా..? అనే ప్రశ్న అందరి మదిలో మెదిలింది. తొలి మ్యాచ్‌లో 48 బంతుల్లోనే 71 పరుగులు చేసిన రాయుడు.. ఈ మ్యాచ్‌కు పూర్తి ఫిట్‌గా లేకపోవడంతో... అతడి స్థానంలో రుతురాజ్‌ను ఆడించారట. టాస్ సమయంలో ఎంఎస్ ధోనీ ఈ విషయాన్ని నిర్ధారించాడు.

రాయుడు జట్టులో లేకపోవడం.. రాజస్థాన్ 200కిపైగా పరుగులు చేయడంతో లక్ష్య చేధనలో చెన్నై తడబడింది. ఆరంభంలో వాట్సన్ (21 బంతుల్లో 33) మెరిసినా.. తొలి వికెట్‌కు 56 పరుగులు జోడించినా.. ఆ తర్వాత వెనువెంటనే మరో మూడు వికెట్లు కోల్పోయి కష్టాల్లో పడింది.