IPL 2021 Points Tableలో టాప్-4 జట్లు ఇవే.. SRH మళ్లీ కిందకి

ఐపీఎల్ 2021 సీజన్ పాయింట్ల పట్టికలో రాజస్థాన్ రాయల్స్‌కి కాస్త ఊరట లభించింది. కోల్‌కతా నైట్‌రైడర్స్‌తో ముంబయిలోని వాంఖడే స్టేడియం వేదికగా శనివారం రాత్రి జరిగిన మ్యాచ్‌లో 6 వికెట్ల తేడాతో అలవోక విజయాన్ని అందుకున్న రాజస్థాన్ రాయల్స్.. మొత్తంగా 4 పాయింట్లతో ఆఖరి స్థానం (8వ) నుంచి ఆరో స్థానానికి ఎగబాకింది. దాంతో.. ఆరో స్థానంలో ఉన్న సన్‌రైజర్స్ హైదరాబాద్ ఏడుకి పడిపోగా.. ఏడులో ఉన్న కోల్‌కతా చిట్టచివరి స్థానానికి దిగజారింది.

పాయింట్ల పట్టికలో రాయల్ ఛాలెంజర్స్ బెంగళూరు (8 పాయింట్లు), చెన్నై సూపర్ కింగ్స్ (6 పాయింట్లు), ఢిల్లీ క్యాపిటల్స్ (6), ముంబయి ఇండియన్స్ (4) టాప్-4లో కొనసాగుతుండగా.. ఆ తర్వాత వరుసగా పంజాబ్ కింగ్స్ (4), రాజస్థాన్ రాయల్స్ (4), సన్‌రైజర్స్ హైదరాబాద్ (2), కోల్‌కతా నైట్‌రైడర్స్ (2) ఉన్నాయి. లీగ్ దశ ముగిసే సమయానికి టాప్-4లో నిలిచిన జట్లు ప్లేఆఫ్‌కి అర్హత సాధించనున్నాయి.


ఈరోజు చెన్నై సూపర్ కింగ్స్, రాయల్ ఛాలెంజర్స్ బెంగళూరు మధ్య మధ్యాహ్నం 3.30 గంటలకి ముంబయిలోని వాంఖడే స్టేడియంలో మ్యాచ్ జరగనుంది. ఈ మ్యాచ్‌లో చెన్నై గెలిస్తే..? మళ్లీ నెం.1 స్థానానికి ఎగబాకనుంది. దానికి కారణం.. బెంగళూరు (+1.009)తో పోలిస్తే చెన్నై సూపర్ కింగ్స్ (+1.142) నెట్ రన్‌రేట్‌ మెరుగ్గా ఉండటమే. ఆ తర్వాత రెండో మ్యాచ్‌లో సన్‌రైజర్స్ హైదరాబాద్, ఢిల్లీ క్యాపిటల్స్ జట్లు చెన్నైలోని చెపాక్ స్టేడియంలో రాత్రి 7.30 గంటలకి తలపడనున్నాయి.