RR టీమ్‌తో ఈరోజు ఫైనల్‌కి గుజరాత్ జట్టిదే.. ఆ రికార్డ్‌తో రాజస్థాన్‌లో కంగారు!

రాజస్థాన్ రాయల్స్‌తో ఈరోజు ఐపీఎల్ 2022 ఫైనల్(IPL 2022 Final)లో గుజరాత్ టైటాన్స్ ఢీకొట్టబోతోంది. అహ్మదాబాద్‌లోని నరేంద్ర మోడీ స్టేడియం వేదికగా రాత్రి 8 గంటలకి ఈ టైటిల్ పోరు జరగనుండగా.. ఇప్పటికే రెండు సార్లు రాజస్థాన్ రాయల్స్‌(Rajasthan Royals)ని గుజరాత్ ఓడించేసింది. దాంతో.. అదే జోరుని ఫైనల్లోనూ కనబర్చాలని గుజరాత్ ఉవ్విళ్లూరుతోంది. సీజన్ ఆరంభం నుంచి సమష్టిగా రాణిస్తున్న గుజరాత్‌ టైటాన్స్ (Gujarat Titans) ఈరోజు రాజస్థాన్ రాయల్స్ ఓడించాలంటే? అత్యుత్తమ ప్రదర్శనని కనబర్చడంతో పాటు ఆ జట్టుకి లక్ కూడా కాస్త కలిసిరావాలి. గుజరాత్ జట్టులో ఓపెనర్లు సాహా, శుభమన్ గిల్ మంచి టచ్‌లో కనిపిస్తున్నారు. కానీ.. ఇద్దరూ నిలకడగా రాణించడం లేదు. అయినప్పటికీ.. ఆ ప్రభావం ఆ జట్టుపై పడకుండా డేవిడ్ మిల్లర్, కెప్టెన్ హార్దిక్ పాండ్య చూసుకుంటున్నారు. మధ్యలో మాథ్యూవెడ్ కూడా గేర్‌లు మారుస్తూ ఆ జట్టు స్కోరు బోర్డుని పరుగులు పెట్టిస్తున్నాడు. ఈ ఐదుగురి తర్వాత కూడా గుజరాత్ టీమ్‌లో రాహుల్ తెవాటియా, రషీద్ ఖాన్ రూపంలో హిట్టింగ్ చేయగల ప్లేయర్లు ఉన్నారు. ఈ ఇద్దరే లీగ్ దశలో ఓ 2-3 మ్యాచ్‌ల్లో గుజరాత్ టీమ్‌ని డెత్ ఓవర్లలో సిక్సర్లు కొట్టి గెలిపించిన విషయం తెలిసిందే. ఇంకా ఆసక్తికరమైన విషయం ఏంటంటే? గుజరాత్ టీమ్ తాజా సీజన్‌లో ఎనిమిది మ్యాచ్‌ల్లో ఛేదనకు దిగగా.. ఏకంగా ఏడు మ్యాచ్‌ల్లో గెలిచింది. అది కూడా ఆఖరి ఓవర్‌లో లక్ష్యాన్ని పూర్తి చేసింది. ఈ రికార్డ్ ఇప్పుడు రాజస్థాన్‌లో కంగారు పెంచుతోంది.

గుజరాత్ బౌలింగ్‌లో మహ్మద్ షమీ.. ప్రతి మ్యాచ్‌లోనూ ప్రత్యర్థి ఓపెనర్లని ఇబ్బంది పెడుతున్నాడు. టెస్ట్ ఫార్మాట్‌ లెంగ్త్‌లు వేస్తున్న షమీ.. బ్యాటర్లు భారీ షాట్లు ఆడే అవకాశం ఇవ్వడం లేదు. అలానే యశ్ దయాల్ కూడా సత్తాచాటుతున్నాడు. కానీ.. ఆల్జారీ జోసెఫ్ మాత్రం ధారాళంగా పరుగులిచ్చేస్తున్నాడు. దాంతో.. ఈరోజు ఫైనల్‌కి అతని స్థానంలో లూకీ ఫెర్గూసన్ టీమ్‌లోకి వచ్చే అవకాశం ఉంది. ఇక మిడిల్ ఓవర్లలో రషీద్ ఖాన్ పొదుపుగా బౌలింగ్ చేస్తుండగా.. అతనికి మరో స్పిన్నర్ సాయి కిషోర్ నుంచి పెద్దగా సపోర్ట్ లభించడం లేదు. అయినప్పటికీ.. కెప్టెన్ హార్దిక్ పాండ్య చొరవ తీసుకుని అతని మద్దతుగా నిలవడంతో పాటు తాను కూడా బౌలింగ్ చేస్తున్నాడు. అయితే.. రాజస్థాన్ రాయల్స్‌(RR)తో పోలిస్తే మాత్రం గుజరాత్ (GT) టీమ్ బౌలింగ్ కాస్త బలహీనంగా కనిపిస్తోంది.

గుజరాత్ టైటాన్స్ తుది జట్టు (అంచనా): వృద్ధిమాన్ సాహా (వికెట్ కీపర్), శుభమన్ గిల్, మాథ్యూ వెడ్, హార్దిక్ పాండ్య (కెప్టెన్), డేవిడ్ మిల్లర్, రాహుల్ తెవాటియా, రషీద్ ఖాన్, సాయి కిషోర్, యశ్ దయాల్, మహ్మద్ షమీ, అల్జారీ జోసెఫ్/ లూకీ ఫెర్గూసన్