ఔటై వెళ్లిపోతున్న అశ్విన్‌ని ఆపిన ఫీల్డ్ అంపైర్.. నీషమ్‌ పెవిలియన్‌కి

లక్నో సూపర్ జెయింట్స్‌తో ఆదివారం రాత్రి జరిగిన మ్యాచ్‌లో రాజస్థాన్ రాయల్స్ ఆల్‌రౌండర్ రవిచంద్రన్ అశ్విన్ రనౌటై వెళ్లిపోతుండగా.. ఫీల్డ్ అంపైర్ అతడ్ని ఆపాడు. దాంతో.. అతని సహచర బ్యాటర్ జేమ్స్ నీషమ్ పెవిలియన్‌ వైపు నడవడం అందర్నీ ఆశ్చర్యపరిచింది. మ్యాచ్‌లో ఫస్ట్ బ్యాటింగ్ చేసిన రాజస్థాన్ టీమ్ 6 వికెట్ల నష్టానికి 178 పరుగులు చేయగా.. ఆఖరి వరకూ క్రీజులో ఉన్న అశ్విన్ 7 బంతుల్లో 1x4 సాయంతో 10 పరుగులు మాత్రమే చేయగలిగాడు. అలానే నీషమ్ కూడా 12 బంతుల్లో 2x4 సాయంతో 14 పరుగులే చేసి పెవిలియన్‌కి చేరాడు. అనంతరం ఛేదనలో లక్నో టీమ్ 154/8కే పరిమితమైంది. అసలు ఏం జరిగిందంటే? మ్యాచ్‌లో ఇన్నింగ్స్ 18వ ఓవర్ వేసిన స్పిన్నర్ రవి బిష్ణోయ్ బౌలింగ్‌లో బంతిని కవర్స్ దిశగా అశ్విన్ హిట్ చేశాడు. ఆ వెంటనే సింగిల్ కోసం నాన్‌స్ట్రైక్ ఎండ్‌లోని నీషమ్ పిలవగా.. స్పందించిన అశ్విన్ రెండు అడుగులు ముందుకు వేసి బంతి నేరుగా కేఎల్ రాహుల్ చేతుల్లోకి వెళ్తుండటంతో ఆగిపోయాడు. కానీ.. అప్పటికే నీషమ్.. పిచ్ మధ్యలోకి వెళ్లిపోయాడు. దాంతో.. ఎవరు ఎటు వెళ్లాలో? కొన్ని క్షణాలు నిర్ణయించుకోలేకపోయారు. అదే సమయంలో బంతిని అందుకున్న రాహుల్.. బిష్ణోయ్‌కి త్రో చేయడంతో అతను నాన్‌స్ట్రైక్ ఎండ్‌లోని స్టంప్‌లని గీరాటేశాడు. అదే సమయంలో అప్పటికి పిచ్ మధ్యలో ఉన్న నీషమ్ అశ్విన్‌ని క్రాస్ చేసి స్ట్రైక్ ఎండ్‌లోకి వెళ్లాడు. దాంతో.. అశ్విన్ తాను రనౌట్ అనుకుని పెవిలియన్ వైపు నడిచాడు. అశ్విన్ రనౌట్‌ని స్టేడియంలోని గ్యాలరీ నుంచి చూసిన అతని భార్య ప్రీతి, కూతురు బాధపడుతూ కనిపించారు.

కానీ.. అశ్విన్ వెళ్తుండగా ఫీల్డ్ అంపైర్ అతడ్ని ఆపాడు. రిప్లైలో అశ్విన్‌ని నీషమ్ క్రాస్ చేసేలోపే బిష్ణోయ్ బెయిల్స్‌ని పడగొట్టినట్లు తేలింది. దాంతో.. అశ్విన్ మళ్లీ క్రీజులోకి వెళ్లగా.. నీషమ్ పెవిలియన్‌ వైపు నడిచాడు. ఒకవేళ బెయిల్స్‌ని బిష్ణోయ్ ఎగరగొట్టేలోపే అశ్విన్‌ని నీషమ్ క్రాస్ చేసి ఉంటే? అప్పుడు అశ్విన్ రనౌట్‌గా వెనుదిరిగేవాడు.