RCB పిలుపుతో పెళ్లిని వాయిదా వేసుకున్న పాటిదార్.. ఆలస్యంగా వెలుగులోకి

రాయల్ ఛాలెంజర్స్ బెంగళూరు (RCB) టీమ్ నుంచి పిలుపు రావడంతో మిడిలార్డర్ బ్యాటర్ రజత్ పాటిదార్ (Rajat Patidar) తన పెళ్లిన వాయిదా వేసుకున్న విషయం ఆలస్యంగా వెలుగులోకి వచ్చింది. ఈ ఏడాది ఫిబ్రవరిలో జరిగిన ఐపీఎల్ 2022 (IPL 2022) సీజన్ ఆటగాళ్ల మెగా వేలానికి రూ.20 లక్షల కనీస ధరతో రజత్ పాటిదార్ వెళ్లగా.. ఆర్సీబీతో పాటు ఏ ఫ్రాంఛైజీ కూడా అతని కోసం బిడ్ వేయలేదు. దాంతో.. అన్‌సోల్డ్‌గా మిగిలిపోయిన పాటిదార్.. మే 9న వివాహం చేసుకునేందుకు ఏర్పాట్లు చేసుకున్నాడు. కానీ.. ఐపీఎల్ 2022 సీజన్ ఆరంభమైన రోజుల వ్యవధిలోనే బెంగళూరు వికెట్ కీపర్/ బ్యాటర్ లువింగ్ శిసోడియా గాయపడి టోర్నీ మొత్తానికీ దూరమయ్యాడు. దాంతో.. అతని స్థానం భర్తీ కోసం రజత్ పాటిదార్‌కి ఆర్సీబీ నుంచి పిలుపు వెళ్లింది. అప్పటికే వివాహ ఏర్పాట్లలో ఉన్న రజత్ పాటిదార్ ఈ పిలుపుని ఊహించలేదు. కానీ.. వెంటనే ఓకే చెప్పేసి బెంగళూరు టీమ్‌తో చేరిపోయాడు. దాంతో.. అతని వివాహం కూడా వాయిదాపడింది.

‘‘మే 9న అతనికి వివాహం చేయాలని తొలుత నిశ్చయించాం. ఆ మేరకు ఇండోర్‌లోని ఓ హోటల్‌ని కూడా బుక్ చేశాం. కానీ.. పెళ్లి వాయిదా పడింది. అతని ఐపీఎల్, రంజీ మ్యాచ్‌లు అయిపోయిన జులైలో వివాహం చేస్తాం’’ అని పాటిదార్ తండ్రి మనోహర్ పాటిదార్ వెల్లడించాడు.

లక్నో సూపర్ జెయింట్స్‌తో బుధవారం రాత్రి జరిగిన ఎలిమినేటర్ మ్యాచ్‌లో రజత్ పాటిదార్ శతకం బాది ఒంటిచేత్తో బెంగళూరు టీమ్‌ని గెలిపించాడు. మ్యాచ్‌లో 54 బంతులాడిన పాటిదార్ 12x4, 7x6 సాయంతో అజేయంగా 112 పరుగులు చేశాడు. 15 ఏళ్ల ఐపీఎల్ చరిత్రలో ప్లేఆఫ్స్‌లో శతకం బాదిన ఏకైక అన్‌క్యాప్‌డ్ ప్లేయర్‌గా రజత్ పాటిదార్ అరుదైన రికార్డ్ నెలకొల్పాడు. ఈరోజు రాత్రి రాజస్థాన్ రాయల్స్ (RR)తో ఐపీఎల్ 2022 (IPL 2022 Qualifier 2) మ్యాచ్‌లో బెంగళూరు తలపడనుంది.