IPL 2023 Mini Auction: బీసీసీఐకి ఫ్రాంచైజీల రిక్వెస్ట్.. వేలం తేదీ మార్పు..?

IPL 2023 Mini Auction: ఐపీఎల్ 2023 మినీ వేలానికి సన్నద్ధం అవుతోన్న ఫ్రాంచైజీలు.. వేలం జరగనున్న తేదీ విషయంలో మాత్రం ఒకింత ఇబ్బంది పడుతున్నాయి. క్రిస్మస్ పండుగకు ముందు మినీ వేలం నిర్వహిస్తుండటంతో విదేశాలకు చెందిన సహాయక సిబ్బంది డిసెంబర్ 23న అందుబాటులో ఉండే అవకాశాల్లేవు. దీంతో వేలం తేదీని రీషెడ్యూల్ చేయాలని ఫ్రాంచైజీలు బీసీసీఐని కోరనున్నాయట. అదే జరిగితే వేలాన్ని కొద్ది రోజులు ముందుకు గానీ, జనవరి తొలి వారంలోగానీ నిర్వహించే అవకాశం ఉంది.

Authored byరవి కుమార్ | Samayam Telugu 22 Nov 2022, 6:03 pm

IPL 2023 Mini Auction: ఐపీఎల్‌ ఫ్రాంచైజీలు మినీ వేలానికి సన్నద్ధం అవుతున్నాయి. ఇప్పటికే ఆటగాళ్ల రిటైన్, రిలీజ్ ప్రక్రియను పూర్తి చేసిన 10 ఫ్రాంచైజీలు.. వేలంలో ఎవరిని సొంతం చేసుకోవాలనే విషయమై కసరత్తులు ప్రారంభించాయి. ఐపీఎల్ మినీ వేలం డిసెంబర్ 23న కొచ్చిలో జరగనుండగా.. మెజార్టీ ఫ్రాంచైజీలు వేలం తేదీని మార్చాలని బీసీసీఐని కోరనున్నాయని తెలుస్తోంది. డిసెంబర్ 25న క్రిస్మస్ ఉండటంతో.. ఫ్రాంచైజీలకు చెందిన విదేశీ సహాయక సిబ్బంది 23వ తేదీన అందుబాటులో ఉండే అవకాశాలు లేవు.

దీంతో వేలాన్ని రీషెడ్యూల్ చేయాలని ఫ్రాంచైజీలు బీసీసీఐని కోరతాయని సమాచారం. మినీ వేలం తేదీని మారిస్తే తమ సహాయక సిబ్బందిలో ఎక్కువగా మంది అందుబాటులో ఉంటారని ఫ్రాంచైజీలు భావిస్తున్నాయి. వేలం తేదీ మార్పు విషయమై ఫ్రాంచైజీలు అభ్యర్థిస్తే బోర్డు సానుకూలంగా స్పందించే అవకాశం ఉంది. వేలాన్ని కాస్త ముందు గానీ.. జనవరి తొలి వారంలో గానీ నిర్వహించే ఛాన్స్ ఉంది.

ఐపీఎల్ 2023 మినీ వేలంలో సామ్ కర్రన్, కేన్ విలియమ్సన్, బెన్ స్టోక్స్, అలెక్స్ హేల్స్, అదిల్ రషీద్ లాంటి స్టార్ ఆటగాళ్లు తమ అదృష్టాన్ని పరీక్షించుకోనున్నారు. ఇంగ్లాండ్ టీ20 వరల్డ్ కప్‌ గెలవడంలో కీలక పాత్ర పోషించిన సామ్ కర్రన్ కోసం ఫ్రాంచైజీలు పోటీ పడే అవకాశం ఉంది. స్టార్ ప్లేయర్స్ కోసం ఫ్రాంచైజీలు పెద్ద మొత్తాన్ని ఆఫర్ చేయడానికి ముందుకు వస్తాయనడంలో ఎలాంటి సందేహం లేదు.

163 మంది ఆటగాళ్లను రిటైన్ చేసుకున్న ఐపీఎల్ జట్లు.. 85 మంది ఆటగాళ్లను వేలానికి రిలీజ్ చేశాయి. మినీ వేలంలో అంతర్జాతీయ క్రికెటర్లకు లబ్ధి చేకూరడం ఆనవాయితీగా వస్తోంది. మినీ వేలం కోసం ఫ్రాంచైజీల ఖాతాలో అదనంగా రూ.5 కోట్లను జమ చేశారు.

మినీ వేలానికి ముందు సన్‌రైజర్స్ ఖాతాలో అత్యధికంగా రూ.42.25 కోట్ల మనీ ఉండగా.. కోల్‌కతా నైట్ రైడర్స్ వద్ద అత్యల్పంగా రూ.7.05 కోట్ల నగదు ఉంది. భారీ మొత్తంలో నగదు ఉన్న సన్‌రైజర్స్, పంజాబ్ ఫ్రాంచైజీలు వేలంలో స్టార్ ప్లేయర్స్ కోసం తీవ్రంగా ప్రయత్నించే అవకాశం ఉంది.

ఐపీఎల్ 2022కు ముందు నిర్వహించిన మెగా వేలాన్ని ఈ ఏడాది ఫిబ్రవరిలో రెండు రోజులపాటు నిర్వహించారు. అదే సమయంలో రెండు జట్లను లీగ్‌లోకి చేర్చారు. ఈసారి మినీ వేలం మాత్రం ఒక్క రోజే జరగనుంది. ఇంతకు ముందులాగే వచ్చే సీజన్లోనూ జట్లకు హోం గ్రౌండ్ అడ్వాంటేజ్ ఉండనుంది.

IPL 2023 Mini Auction: బీసీసీఐకి ఫ్రాంచైజీల రిక్వెస్ట్.. వేలం తేదీ మార్పు..?

తరవాత కథనం