విదేశాల్లో ఐపీఎల్ 2020 నాకౌట్ మ్యాచ్‌లు..!

ఐపీఎల్ 2020 సీజన్ ప్లేఆఫ్ మ్యాచ్‌లు విదేశాల్లో నిర్వహించాలని భారత క్రికెట్ నియంత్రణ మండలి (బీసీసీఐ)ని టోర్నీలోని ఓ మూడు ఫ్రాంఛైజీలు అభ్యర్థించాయి. మార్చి 29 నుంచి ఐపీఎల్ 2020 సీజన్ మ్యాచ్‌లు ప్రారంభంకానుండగా.. మే 17 వరకూ లీగ్ దశ మ్యాచ్‌లు జరగనున్నాయి. ఈ మేరకు ఇప్పటికే లీగ్ దశ షెడ్యూల్‌ని విడుదల చేసిన బీసీసీఐ.. నాకౌట్ మ్యాచ్‌ల తేదీలు, వేదికల వివరాలు మాత్రం వెల్లడించలేదు. అయితే.. మే 24న ఫైనల్ జరగనున్నట్లు మాత్రం ప్రకటించింది.

ఐపీఎల్ ప్లేఆఫ్ మ్యాచ్‌ల షెడ్యూల్‌ని బీసీసీఐ ప్రకటించకపోవడానికి కారణం.. రాయల్ ఛాలెంజర్స్ బెంగళూరు, రాజస్థాన్ రాయల్స్, ముంబయి ఇండియన్స్ ఫ్రాంఛైజీలేనట. ఇటీవల బీసీసీఐ ఉన్నాధికారుల్ని కలిసిన ఈ మూడు ఫ్రాంఛైజీలు నాకౌట్ మ్యాచ్‌ల్నిభారత్ వెలుపల నిర్వహించాలని కోరినట్లు వార్తలు వస్తున్నాయి. మరీ ముఖ్యంగా.. క్రికెట్‌కి పెద్దగా ఆదరణలేని అమెరికా, కెనడా, సింగపూర్‌లో ఈ ప్లేఆఫ్ మ్యాచ్‌ల్ని నిర్వహించడం ద్వారా.. టోర్నీ ఆదరణ మరింత పెరగనుందని ఫ్రాంఛైజీలు సూచించినట్లు తెలుస్తోంది. దీంతో బీసీసీఐ కూడా పునరాలోచనలో పడిందట.

2008లో ప్రారంభమైన ఐపీఎల్.. క్రికెట్ ప్రపంచంలోనే అత్యంత ఆదరణ ఉన్న టోర్నీగా విరాజిల్లుతోంది. ఈ టోర్నీకి పోటీగా ఆస్ట్రేలియా, పాకిస్థాన్, దక్షిణాఫ్రికా, వెస్టిండీస్, బంగ్లాదేశ్ తదితర దేశాలు ప్రైవేట్ టీ20 లీగ్స్‌ని నిర్వహించినా.. ఐపీఎల్‌ ముందు అవి తేలిపోయాయి. దీంతో.. ఐపీఎల్‌ని ఎక్కడ నిర్వహించినా.. ఆదరణ ఏమాత్రం తగ్గదని బీసీసీఐ ముందు స్పష్టం చేసిన ఫ్రాంఛైజీలు.. క్రికెట్‌కి ఆదరణలేని దేశాల్లో నిర్వహించడం ద్వారా.. అక్కడి ప్రేక్షకుల్ని కూడా ఈ టోర్నీకి దగ్గర చేయాలని భావిస్తున్నాయి.