IPL 2021 పాయింట్ల పట్టికలో CSK టాప్.. లాస్ట్‌లో ఏ టీమ్ ఉందంటే..?

ఐపీఎల్ 2021 సీజన్ పాయింట్ల పట్టికలో చెన్నై సూపర్ కింగ్స్ మళ్లీ టాప్‌లోకి దూసుకెళ్లింది. ముంబయి ఇండియన్స్‌తో ఆదివారం రాత్రి దుబాయ్ వేదికగా జరిగిన మ్యాచ్‌లో 20 పరుగుల తేడాతో గెలుపొందిన చెన్నై టీమ్.. ఆరో విజయంతో రెండో స్థానం నుంచి నెం.1 స్థానానికి ఎగబాకింది. ఢిల్లీ క్యాపిటల్స్ ఖాతాలోనూ 12 పాయింట్ల ఉన్నప్పటికీ.. ఆ జట్టు నెట్‌ రన్‌రేట్ (+0.547) పోలిస్తే చెన్నై టీమ్ నెట్ రన్‌రేట్ (+1.223) మెరుగ్గా ఉంది. ఈరోజు కోల్‌కతా నైట్‌రైడర్స్, రాయల్ ఛాలెంజర్స్ బెంగళూరు మధ్య అబుదాబి వేదికగా మ్యాచ్ జరగనుంది. సీజన్ లీగ్ దశ మ్యాచ్‌లు ముగిసే సమయానికి పాయింట్ల పట్టికలో టాప్-4లో నిలిచిన జట్లు ప్లేఆఫ్‌కి అర్హత సాధించనున్నాయి. ప్రస్తుతం చెన్నై సూపర్ కింగ్స్ (12 పాయింట్లు), ఢిల్లీ క్యాపిటల్స్ (12), రాయల్ ఛాలెంజర్స్ బెంగళూరు (10), ముంబయి ఇండియన్స్ (8) పట్టికలో టాప్-4లో ఉన్నాయి. అయితే.. ఇందులో బెంగళూరు -0.171 నెట్‌ రన్‌‌రేట్‌తో ఉండగా.. ఆదివారం రాత్రి పరాజయంతో ముంబయి టీమ్ నెట్ రన్‌రేట్ కూడా -0.071కి పడిపోయింది.

పాయింట్ల పట్టికలో చివరి నాలుగు స్థానాల్లో రాజస్థాన్ రాయల్స్ (6 పాయింట్లు), పంజాబ్ కింగ్స్ (6), కోల్‌కతా నైట్‌రైడర్స్ (4), సన్‌రైజర్స్ హైదరాబాద్ (2) ఉన్నాయి. ఇందులో హైదరాబాద్ ప్లేఆఫ్ రేసులో నిలవాలంటే.. ఇక ఆడే ఏడు మ్యాచ్‌ల్లోనూ తప్పక గెలవాల్సి ఉంటుంది.