IPL 2023 ముంగిట పంజాబ్ కింగ్స్‌కి పవర్ హిట్టర్ ఝలక్.. ఇప్పుడెలా?

ఐపీఎల్ 2023 (IPL 2023) ముంగిట పంజాబ్ కింగ్స్‌(Punjab Kings)కి ఇంగ్లాండ్ టీమ్ పవర్ హిట్టర్ జానీ బెయిర్‌స్టో (Jonny Bairstow) ఝలక్ ఇచ్చాడు. గత కొంత కాలంగా గాయంతో ఆటకి దూరంగా ఉంటున్న జానీ బెయిర్‌స్టో ఐపీఎల్ 2023కి కూడా దూరంగా ఉండాలని నిర్ణయించుకున్నాడట. వాస్తవానికి అతను గాయం నుంచి ఇటీవల కోలుకున్నట్లు కనిపించాడు. నెట్స్‌లో కూడా బ్యాటింగ్ ప్రాక్టీస్ చేస్తున్న వీడియో బయటికి వచ్చింది.కానీ.. ఈ ఏడాది యాషెష్ సిరీస్ ఉండటంతో ఆ సిరీస్ టైమ్‌కి పూర్తి ఫిట్‌గా ఉండాలని బెయిర్‌స్టో ఆశిస్తున్నాడు. దాంతో ఐపీఎల్ 2023 మొత్తానికీ దూరంగా ఉండాలని నిర్ణయించుకున్నట్లు వార్తలు వస్తున్నాయి. కానీ ఇంకా అధికారిక ప్రకటన అయితే రాలేదు. మార్చి 31 నుంచి ఐపీఎల్ 2023 మ్యాచ్‌లు ప్రారంభంకానుండగా.. ఏప్రిల్ 1న తన ఫస్ట్ మ్యాచ్‌లో కోల్‌కతా నైట్‌రైడర్స్‌తో పంజాబ్ కింగ్స్ ఢీకొట్టనుంది.

కాలి గాయం కారణంగా పాకిస్థాన్, న్యూజిలాండ్‌తో సిరీస్‌లకి దూరంగా ఉండిపోయిన జానీ బెయిర్‌స్టో సర్జరీ కూడా చేయించుకున్నాడు. అతని కాలికి మెటల్ ప్లేట్‌ని కూడా డాక్టర్లు అమర్చారు. అయినప్పటికీ వేగంగా కోలుకుని ఇటీవల నెట్స్‌లో బంతిని బలంగా బాదుతూ కనిపించాడు. కానీ 100% కోలుకోకుండానే ఐపీఎల్‌లో ఆడితే గాయం తిరగబడే ప్రమాదం ఉందని బెయిర్‌స్టో భావిస్తున్నాడు. దాంతో అతని స్థానంలో ప్లేయర్ కోసం పంజాబ్ వేటని మొదలుపెట్టింది.

ఐపీఎల్‌లో ఇప్పటి వరకు 39 మ్యాచ్‌లాడిన జానీ బెయిర్‌స్టో.. 142.65 స్ట్రైక్‌రేట్‌తో 1291 పరుగులు చేశాడు. ఇందులో ఒక సెంచరీ, 9 హాఫ్ సెంచరీలు ఉన్నాయి. అలానే 133 ఫోర్లు, 55 సిక్సర్లని జానీ బెయిర్‌స్టో కొట్టాడు. 2019 నుంచి ఐపీఎల్‌లో జానీ బెయిర్‌స్టో ఆడుతున్నాడు.

Read Latest Sports News, Cricket News, Telugu News