IPL: కేఎల్ రాహుల్ అరుదైన రికార్డ్.. ఐపీఎల్‌లో ఏకైక బ్యాట్స్‌మెన్, వార్నర్ బ్యాడ్ లక్!

కింగ్స్ ఎలెవన్ పంజాబ్ కెప్టెన్ కేఎల్ రాహుల్ ఐపీఎల్‌లో అరుదైన రికార్డ్ క్రియేట్ చేశాడు. ముంబైతో జరిగిన మ్యాచ్‌లో 77 రన్స్ చేసిన రాహుల్.. ఈ సీజన్లో 500కుపైగా రన్స్ పూర్తి చేసుకున్నాడు. తద్వారా వరుసగా మూడు ఐపీఎల్ సీజన్లలో 500కిపైగా పరుగులు చేసిన తొలి బ్యాట్స్‌మెన్‌గా రాహుల్ రికార్డ్ క్రియేట్ చేశాడు. గత సీజన్లో 593 రన్స్ చేసిన రాహుల్.. 2018లో 659 పరుగులు చేశాడు.

ఈ సీజన్లో రాహుల్ ఇప్పటి వరకూ 9 ఇన్నింగ్స్‌ల్లో 525 రన్స్‌తో టాప్ స్కోరర్‌గా కొనసాగుతున్నాడు. రాహుల్ ఆరెంజ్ క్యాప్ హోల్డర్‌గా ఉండగా.. పంజాబ్ మరో ఓపెనర్ మయాంక్ అగర్వాల్ 393 రన్స్‌తో రెండో స్థానంలో ఉన్నాడు.

2018 ఏప్రిల్ నుంచి ఐపీఎల్‌లో రాహుల్ 1777 రన్స్ చేశాడు. అందులో 19 హాఫ్ సెంచరీలు ఉన్నాయి. మరే బ్యాట్స్‌మెన్ కూడా గత మూడు సీజన్లలో ఇన్ని పరుగులు చేయలేదు. ఢిల్లీ ఓపెనర్ శిఖర్ ధావన్ మూడు సీజన్లలో కలిపి 1377 రన్స్ చేశాడు. బాల్ ట్యాంపరింగ్ వివాదం కారణంగా 2018 సీజన్ మొత్తానికి దూరమైన డేవిడ్ వార్నర్.. రెండు సీజన్లలో కలిపి 1023 రన్స్ చేయడం విశేషం.