సన్‌రైజర్స్‌పై విజయాన్ని క్రికెటర్ మన్‌‌దీప్ తండ్రికి అంకితమిచ్చిన పంజాబ్!

సన్‌రైజర్స్ హైదరాబాద్ చేతుల్లో నుంచి విజయాన్ని లాగేసుకున్న కింగ్స్ ఎలెవన్ పంజాబ్.. ఈ విజయాన్ని మన్‌దీప్ సింగ్ తండ్రికి అంకితమిచ్చింది. మ్యాచ్ ముందు రోజు రాత్రి మన్‌దీప్ సింగ్ తండ్రి మరణించారు. తనను ఇంతటి వాణ్ని చేసిన తండ్రి చనిపోయిన బాధను దిగమింగుతూనే.. మనదీప్ సన్‌రైజర్స్‌తో మ్యాచ్‌లో బరిలో దిగాడు.

మన్‌దీప్ తండ్రి ఆరోగ్యం గత కొంత కాలంగా బాగోలేదు. గత వారం రోజుల నుంచి ఆయన ఆరోగ్య పరిస్థితి విషమించింది. శుక్రవారం రాత్రి ఆయన తుది శ్వాస విడిచారు. దీంతో మన్‌దీప్ తండ్రి మరణానికి సంతాప సూచికగా.. పంజాబ్ ఆటగాళ్లు చేతికి నల్లటి రిబ్బన్లు కట్టుకొని మ్యాచ్‌లో బరిలోకి దిగారు.

ఈ మ్యాచ్‌‌కు మయాంక్ అగర్వాల్ దూరం కావడంతో.. అతడి స్థానంలో ఓపెనర్‌గా ఆడిన మన్‌దీప్ 14 బంతుల్లో 17 రన్స్ చేసి.. తొలి వికెట్‌కు రాహుల్‌తో కలిసి 37 రన్స్ జోడించాడు.

ఈ మ్యాచ్‌లో పంజాబ్ 126 పరుగులకే పరిమితమైనప్పటికీ.. బౌలర్లు అద్భుత ప్రదర్శనతో 14 పరుగుల వ్యవధిలోనే ఏడు వికెట్లు కూల్చి.. పంజాబ్‌కు ఊహించని విజయాన్ని కట్టబెట్టారు.