రెండో మ్యాచ్‌లోనూ చివరి బంతికే.. ముంబై చెత్త రికార్డ్

డిఫెండింగ్ ఛాంపియన్ ముంబై ఇండియన్స్‌ను దురదృష్టం వెంటాడుతోంది. వరుసగా మూడు మ్యాచ్‌ల్లో చివరి ఓవర్ వరకూ పోరాడి ఓడిన రోహిత్ సేన.. విజయం కోసం మరో మ్యాచ్ దాకా నిరీక్షించాల్సిన పరిస్థితి తెచ్చుకుంది. ఐపీఎల్ ఆరంభ మ్యాచ్‌లో చెన్నై చేతిలో అనూహ్యంగా ఓడిన ముంబై జట్టు.. రెండో మ్యాచ్‌లో సన్‌రైజర్స్ చేతిలో ఓడింది. దీంతో ఫామ్‌లో లేని రోహిత్.. ఢిల్లీతో జరిగిన మ్యాచ్‌లో ఓపెనర్‌గా తన స్థానంలో సూర్యకుమార్ యాదవ్‌కు బ్యాటింగ్ చేసే అవకాశాన్ని కల్పించాడు.

ఓపెనర్లు రాణించి శతక భాగస్వామ్యం నెలకొల్పడంతో ముంబై భారీ స్కోరు సాధించేలా కనిపించింది. కానీ చివర్లో తడబడి వేగంగా వికెట్లను చేజార్చుకుంది. ఆఖరి ఐదు ఓవర్లలో పరుగులు రాబట్టలేక 195 పరుగులకే పరిమితమైంది. ఫీల్డింగ్ వైఫల్యం కూడా ముంబై కొంప ముంచింది.

చెన్నైతో జరిగిన తొలి మ్యాచ్‌లో బ్రావో విధ్వంసం సృష్టించడంతో విజయంపై ఆశల్లేని సూపర్ కింగ్స్.. ఆఖరి ఓవర్ ఐదో బంతికి గెలుపొందింది. మలి మ్యాచ్‌లోనూ దీపక్ హుడా సమయోచిత బ్యాటింగ్ కారణంగా ఆఖరి బంతికి సన్‌రైజర్స్ విజయం సాధించింది.

ఇక ఢిల్లీతో మ్యాచ్‌లోనూ అదే పరిస్థితి. చివరి ఓవర్లో ఢిల్లీ విజయానికి 11 పరుగులు అవసరమైన వేళ.. జాసన్ రాయ్ ఫోర్, సిక్స్‌తో మ్యాచ్ టై అయ్యింది. ముస్తాఫిజుర్ వరుసగా కట్టుదిట్టంగా బంతులేయడంతో మూడు బంతులకు పరుగులేమీ రాలేదు. రోహిత్ పకడ్బందీగా ఫీల్డింగ్ సెట్ చేసినా.. బంతిని గాల్లోకి లేపిన రాయ్ చివరి బంతికి సింగిల్ తీసి ఢిల్లీని గెలిపించాడు.

తొలి రెండు మ్యాచ్‌ల్లో 46 పరుగులిచ్చి ఏడు వికెట్లు పడగొట్టిన యువ స్పిన్నర్ మయాంక్ మార్కండే.. ఈ మ్యాచ్‌లో దారుణంగా విఫలమయ్యాడు. అతడు 3 ఓవర్లలోనే 42 పరుగులివ్వడం ముంబై అవకాశాలను దెబ్బతీసింది. దీంతో వరుసగా రెండు మ్యా‌చ్‌ల్లో చివరి బంతికి ఓడిన తొలి ఐపీఎల్ జట్టుగా రోహిత్ సేన నిలిచింది.