CSK vs MI: శామ్ కరన్‌ 4, 4, 4కి బౌల్ట్ ఫర్‌ఫెక్ట్ రిప్లై.. స్టంప్‌ గాల్లోకి ఎగిరి..?

ఐపీఎల్ 2020 సీజన్‌ని పేలవంగా ఆరంభించిన ముంబయి ఇండియన్స్ ఫాస్ట్ బౌలర్ ట్రెంట్ బౌల్ట్.. లీగ్ దశ ముగింపులో అత్యుత్తమ లయతో అదరగొట్టేస్తున్నాడు. చెన్నై సూపర్ కింగ్స్‌తో షార్జా వేదికగా శుక్రవారం రాత్రి జరిగిన మ్యాచ్‌లో 4 ఓవర్లు వేసిన ట్రెంట్ బౌల్ట్ కేవలం 18 పరుగులు మాత్రమే ఇచ్చి నాలుగు వికెట్లు పడగొట్టాడు. ఇందులో ఒక మెయిడిన్ ఓవర్ కూడా ఉంది. తొలి మూడు ఓవర్లలో 5 పరుగులు మాత్రమే ఇచ్చిన బౌల్ట్.. ఇన్నింగ్స్ ఆఖరి ఓవర్‌ బౌలింగ్‌కిరాగా.. చెన్నై ఆల్‌రౌండర్ శామ్ కరన్ (52: 47 బంతుల్లో 4x4, 2x6) మూడు ఫోర్లు బాదేశాడు. మరీ ముఖ్యంగా.. ఆఫ్ స్టంప్‌కి వెలుపలగా వెళ్లి మరీ కరన్ బంతిని వెనక్కి నెడుతూ కనిపించాడు. దాంతో.. ఆ ఓవర్ ఆఖరి బంతిని కళ్లు చెదిరే యార్కర్ రూపంలో బౌల్ట్ సంధించాడు.

ఆఫ్ స్టంప్‌ లైన్‌పై గంటకి 136కిమీ వేగంతో పడిన యార్కర్ బంతిని శామ్ కరన్ మరోసారి ఆఫ్ స్టంప్‌కి వెలుపలగా వెళ్లి హిట్ చేసే ప్రయత్నం చేశాడు. కానీ.. అతని కాళ్ల మధ్య పడిన బంతి నేరుగా వెళ్లి ఆఫ్ స్టంప్‌ని ఎగరొట్టింది. బంతి తగిలిన వేగానికి స్టంప్‌ గాల్లోకి ఎగిరి చక్కర్లు కొడుతూ వెళ్లి పడింది. స్టంప్‌ ఒక్కటే కాదు.. శామ్ కరన్ కూడా షాట్ ఆడే క్రమంలో పట్టు జారి క్రీజులో కిందపడిపోయాడు. మొత్తంగా.. ఆ ఓవర్‌లో శామ్ కరన్ కొట్టిన మూడు ఫోర్లకి ట్రెంట్ బౌల్ట్ బదులు తీర్చుకున్నాడు.

మ్యాచ్‌లో టాస్ ఓడి తొలుత బ్యాటింగ్ చేసిన చెన్నై టీమ్‌ని ట్రెంట్ బౌల్ట్ (4/18), జస్‌ప్రీత్ బుమ్రా (2/25), రాహుల్ చాహర్ (2/22) అద్భుత బౌలింగ్ ప్రదర్శనతో 114/9కే పరిమితం చేశారు. ఆ టీమ్‌లో ఆరుగురు బ్యాట్స్‌మెన్‌లు సింగిల్ డిజిట్‌కే పరిమితమవగా.. శామ్ కరన్ టాప్ స్కోరర్‌గా నిలిచాడు. అనంతరం ఛేదనలో ఓపెనర్లు ఇషాన్ కిషన్ (68 నాటౌట్: 37 బంతుల్లో 6x4, 5x6), డికాక్ (46 నాటౌట్: 37 బంతుల్లో 5x4, 2x6) చెలరేగడంతో ముంబయి ఇండియన్స్ 10 వికెట్ల తేడాతో అలవోక విజయాన్ని అందుకుంది.