IPL 2020 Final ముంగిట బౌల్ట్ గాయంపై అప్‌డేట్.. టెన్షన్ షురూ

ఐపీఎల్ 2020 సీజన్ ఫైనల్ ముంగిట ముంబయి ఇండియన్స్ ఫాస్ట్ బౌలర్ ట్రెంట్ బౌల్ట్ గాయంపై ఆ టీమ్ కెప్టెన్ రోహిత్ శర్మ క్లారిటీ ఇచ్చేశాడు. ఢిల్లీ క్యాపిటల్స్‌తో గత గురువారం జరిగిన క్వాలిఫయర్-1 మ్యాచ్‌లో ఫీల్డింగ్ చేస్తుండగా.. ట్రెంట్ బౌల్ట్ తొడ కండరాలకి గాయమైంది. దాంతో.. మ్యాచ్ మధ్యలోనే మైదానం వీడిన బౌల్ట్.. ఆ తర్వాత మళ్లీ గ్రౌండ్‌లోకి రాలేదు. ఆ మ్యాచ్‌లో కేవలం రెండు ఓవర్లు మాత్రమే బౌలింగ్ చేసిన బౌల్ట్ 9 పరుగులిచ్చి రెండు వికెట్లు పడగొట్టాడు. మరీ ముఖ్యంగా.. తొలి ఓవర్‌లోనే ఆ రెండు వికెట్లూ పడగొట్టడం గమనార్హం. ఆ మ్యాచ్‌లో ముంబయి 57 పరుగుల తేడాతో విజయాన్ని అందుకుంది.

ముంబయి ఇండియన్స్ మంగళవారం రాత్రి దుబాయ్ వేదికగా ఢిల్లీ క్యాపిటల్స్‌తో ఫైనల్లో తలపడబోతోంది. దాంతో.. ఈ మ్యాచ్‌లో ట్రెంట్ బౌల్ట్ ఆడతాడా..? అనే సందేహం అందరిలోనూ నెలకొనగా.. బౌల్ట్ గాయంపై రోహిత్ శర్మ అప్‌డేట్ చెప్పాడు. ‘‘ట్రెంట్ బౌల్ట్ సోమవారం ప్రాక్టీస్ సెషన్‌లో ఉత్సాహంగా పాల్గొన్నాడు. గత రెండు రోజులుగా గాయం నుంచి అతను పూర్తిగా కోలుకున్నట్లు కనిపిస్తోంది. కాబట్టి.. ఫైనల్లో అతను కచ్చితంగా ఆడతాడు’’ అని రోహిత్ శర్మ వెల్లడించాడు.

ఐపీఎల్ 2020 సీజన్‌లో ఇప్పటి వరకూ 14 మ్యాచ్‌లాడిన ట్రెంట్ బౌల్ట్ 19.40 సగటుతో 22 వికెట్లు పడగొట్టాడు. తాజా సీజన్‌లో అత్యధిక వికెట్లు పడగొట్టిన బౌలర్ల జాబితాలో ఢిల్లీ క్యాపిటల్స్ ఫాస్ట్ బౌలర్ కగిసో రబాడ 29 వికెట్లతో నెం.1 స్థానంలో కొనసాగుతుండగా.. ముంబయి టీమ్‌కే చెందిన జస్‌ప్రీత్ బుమ్రా 27 వికెట్లతో తర్వాత స్థానంలో ఉన్నాడు. ఈ ఇద్దరి తర్వాత 22 వికెట్లతో బౌల్ట్ మూడో స్థానంలో కొనసాగుతున్నాడు. లీగ్ దశ‌లో రెండు మ్యాచ్‌లతో పాటు క్వాలిఫయర్-1 మ్యాచ్‌లోనూ ట్రెంట్ బౌల్ట్‌ని ఎదుర్కొనేందుకు ఇబ్బందిపడిన ఢిల్లీ క్యాపిటల్స్ బ్యాట్స్‌మెన్‌లకి ఫైనల్లో అతని రాక టెన్షన్ పెంచేదే..!