IPL 2020: సచిన్ మరోసారి హెచ్చరిక.. ధవళ్ కులకర్ణికి తప్పిన ప్రమాదం

‘మైదానంలోనే ఉన్నంతసేపూ బ్యాట్స్‌మెన్‌కి హెల్మెట్ తప్పనిసరి’ భారత దిగ్గజ క్రికెటర్ సచిన్ టెండూల్కర్ ఇటీవల చేసిన హెచ్చరిక ఇది. కింగ్స్ ఎలెవన్ పంజాబ్‌తో అక్టోబరు 24న జరిగిన మ్యాచ్‌లో సన్‌రైజర్స్ హైదరాబాద్ బ్యాట్స్‌మెన్ విజయ్ శంకర్‌కి ఫీల్డర్ నికోలస్ పూరన్ విసిరిన బంతి వేగంగా వెళ్లి తాకడంతో సచిన్ ఈ మేరకు బ్యాట్స్‌మెన్‌లను హెచ్చరించాడు. అంతేకాదు.. అంతర్జాతీయ క్రికెట్ కౌన్సిల్ (ఐసీసీ) ఆ దిశగా ఓ రూల్‌ని తీసుకురావాలని కూడా సూచించాడు. కానీ.. సచిన్ వాదనని ఎవరూ పట్టించుకోలేదు. కానీ.. షార్జా వేదికగా సన్‌రైజర్స్‌ హైదరాబాద్‌తో మంగళవారం రాత్రి జరిగిన మ్యాచ్‌లో ముంబయి ఇండియన్స్ ఆటగాడు ధవళ్ కులకర్ణి‌కి త్రో తగిలిన తీరు చూసిన తర్వాత అందరూ సచిన్ వాదనతో ఏకీభవిస్తున్నారు.


ఇన్నింగ్స్ చివరి ఓవర్ వేసిన హైదరాబాద్ బౌలర్ జేసన్ హోల్డర్ బౌలింగ్‌లో బంతిని లాంగాన్ దిశగా హిట్ చేసిన ధవళ్ కులకర్ణి (3: 2 బంతుల్లో).. ఫీల్డర్ చేతిలో బంతి ఉండగానే డబుల్‌ కోసం సాహసోపేతంగా పరుగెత్తాడు. దాంతో.. రనౌట్ కోసం ఫీల్డర్ బంతిని వికెట్ కీపర్ సాహా వైపు విసరగా.. అది కీపర్ ఎండ్‌వైపు వస్తున్న కులకర్ణి తల వెనుక భాగంలో తాకింది. బంతి తాకిన వేగానికి అతను ధరించిన హెల్మెట్‌లోని కొంత భాగం విరిగిపడింది. అయితే.. కులకర్ణికి ఎలాంటి గాయం కాకపోవడంతో అంతా ఊపిరి పీల్చుకున్నారు. ఒకవేళ కులకర్ణి ఆ సమయంలో హెల్మెట్ ధరించకుండా ఉండింటే..? చాలా పెద్ద గాయమయ్యేది.


మ్యాచ్‌లో తొలుత బౌలింగ్‌‌లో అదరగొట్టిన సన్‌రైజర్స్ హైదరాబాద్.. ముంబయిని 149/8కే పరిమితం చేసింది. ఆ తర్వాత ఛేదనలో కెప్టెన్ డేవిడ్ వార్నర్ (85 నాటౌట్: 58 బంతుల్లో 10x4, 1x6), సాహా (58 నాటౌట్: 45 బంతుల్లో 7x4, 1x6) అజేయ హాఫ్ సెంచరీలు బాదడంతో 10 వికెట్ల తేడాతో హైదరాబాద్ విజయాన్ని అందుకుంది. దాంతో.. ముంబయి ఇండియన్స్, ఢిల్లీ క్యాపిటల్స్, రాయల్ ఛాలెంజర్స్ బెంగళూరు, సన్‌రైజర్స్ హైదరాబాద్ ప్లేఆఫ్‌లో అడుగుపెట్టాయి. గురువారం నుంచి ప్లేఆఫ్ మ్యాచ్‌లు మొదలుకానున్నాయి.