RCB Team పేసర్ మహ్మద్ సిరాజ్ చెత్త రికార్డ్.. 15 ఏళ్లలో ఫస్ట్ బౌలర్

ఐపీఎల్‌లో రాయల్ ఛాలెంజర్స్ బెంగళూరు ఫాస్ట్ బౌలర్ మహ్మద్ సిరాజ్ చెత్త రికార్డ్ నెలకొల్పాడు. రాజస్థాన్‌తో శుక్రవారం రాత్రి అహ్మదాబాద్ వేదికగా జరిగిన క్వాలిఫయర్-2 మ్యాచ్‌లో 2 ఓవర్లు బౌలింగ్ చేసిన మహ్మద్ సిరాజ్ 15.50 ఎకానమీతో 31 పరుగులిచ్చాడు. కానీ.. ఒక్క వికెట్ కూడా పడగొట్టలేకపోయాడు. సిరాజ్‌ని టార్గెట్ చేసిన రాజస్థాన్ రాయల్స్ ఓపెనర్లు యశస్వి జైశ్వాల్, జోస్ బట్లర్.. భారీ షాట్లు ఆడేశారు. దాంతో.. తొలి మూడు ఓవర్లలోనే రెండు ఓవర్లని అతనితో బౌలింగ్ చేయించిన బెంగళూరు కెప్టెన్ డుప్లెసిస్.. ఆ తర్వాత మళ్లీ బంతి ఇచ్చే సాహసం చేయలేదు. మ్యాచ్‌లో ఫస్ట్ బ్యాటింగ్ చేసిన బెంగళూరు టీమ్ 8 వికెట్ల నష్టానికి 157 పరుగులు చేయగా.. లక్ష్యాన్ని మరో 11 బంతులు మిగిలి ఉండగానే రాజస్థాన్ టీమ్ 161/3తో ఛేదించేసింది. బోర్డుపై తక్కువ స్కోరే ఉన్నప్పటికీ.. మహ్మద్ సిరాజ్‌తో ఫస్ట్ ఓవర్‌ని డుప్లెసిస్ వేయించడం పెద్ద తప్పిదమైంది. ఐపీఎల్ 2022 సీజన్‌లో ధారాళంగా పరుగులిచ్చేస్తూ.. అప్పటికే ఒకసారి వేటుకి గురైన సిరాజ్.. ఫస్ట్ ఓవర్‌లోనే ఒత్తిడి గురై ఏకంగా 16 పరుగులు సమర్పించుకున్నాడు. ఇక అక్కడి నుంచి రాజస్థాన్ ఏ దశలోనూ బెంగళూరు బౌలర్లకి పుంజుకునే అవకాశమే ఇవ్వలేదు.

ఫస్ట్ ఓవర్‌లో సిరాజ్‌ విసిరిన షార్ట్ పిచ్ బంతిని ఫుల్ చేస్తూ సిక్స్‌గా స్టాండ్స్‌లోకి తరలించిన జైశ్వాల్.. ఆ తర్వాత లెంగ్త్ బాల్ రూపంలో పడిన ఆఖరి బాల్‌ని మిడ్ వికెట్ దిశగా స్టాండ్స్‌లోకి కొట్టేశాడు. ఇదే ఓవర్‌లో ఒక ఫోర్ కూడా వచ్చింది. ఆ తర్వాత మూడో ఓవర్‌లోనూ సిరాజ్ బౌలింగ్‌‌కిరాగా.. జోస్ బట్లర్ రెండు ఫోర్లు, ఒక సిక్స్ బాదేశాడు. దాంతో.. వేసిన రెండు ఓవర్లలోనే అతను 16, 15 పరుగులు సమర్పించుకోగా.. ఇందులో మూడు సిక్సర్లు ఉన్నాయి.

2008 నుంచి ఐపీఎల్ జరుగుతుండగా.. ఈ 15 ఏళ్లలో ఒకే సీజన్‌లో అత్యధిక సిక్సర్లు సమర్పించుకున్న బౌలర్‌గా మహ్మద్ సిరాజ్ నిలిచాడు. ఐపీఎల్ 2022 సీజన్‌లో సిరాజ్ 31 సిక్సర్లు సమర్పించుకోగా.. శుక్రవారం రాత్రి వరకూ ఈ చెత్త రికార్డ్ డ్వేన్ బ్రావో పేరిట ఉంది. అతను 2018 సీజన్‌లో 29 సిక్సర్లు కొట్టించుకున్నాడు. బెంగళూరుకి చెందిన స్పిన్నర్ వానిందు హసరంగా కూడా ఐపీఎల్ 2022లో 30 సిక్సర్లు సమర్పించుకోవడం గమనార్హం.