CSK: ధోనీ.. ఈ ఒక్క మార్పు చేస్తే సరిపోతుంది.. అగార్కర్ సలహా

ఐపీఎల్ ప్రారంభానికి ముందే అంతర్జాతీయ క్రికెట్‌కు గుడ్ బై చెప్పిన ధోనీ.. ఈ సీజన్లో అదరగొడతాని అంతా భావించారు. కానీ అందరి అంచనాలను తలకిందులు చేస్తూ.. వరుస పరాజయాలతో తీవ్ర ఇబ్బందుల్లో పడింది. గతంలో ఎన్నడూ లేని విధంగా.. పాయింట్ల పట్టికలో చివరి స్థానానికి పడిపోయే ముప్పును ఎదుర్కొంటోంది. ధోనీ ఆటతీరు సైతం పేలవంగా ఉండటంతో.. కెప్టెన్సీలో మునుపటి చురుకుదనం లేకపోవడంతో.. గతంలో అతణ్ని పొగిడినవారే ఇప్పుడు విమర్శిస్తున్నారు. కెప్టెన్సీ నుంచి తప్పుకోవాలని కూడా కొందరు డిమాడ్ చేస్తున్నారు.

టీమిండియా మాజీ క్రికెటర్ అజిత్ అగర్కార్ మాత్రం ధోనీకి మద్దతుగా నిలిచాడు. ధోనీ ఒక చిన్న మార్పు చేస్తే సరిపోతుందని చెప్పాడు. ఐదో స్థానం కంటే దిగువన మహీ బ్యాటింగ్ చేయొద్దని అగర్కార్ సూచించాడు. పరిస్థితిని బట్టి అతడు బ్యాటింగ్‌కు దిగే స్థానాన్ని మార్చుకోవచ్చు. కానీ ఐదో స్థానం కంటే దిగువన మాత్రం ఆడొద్దని సలహా ఇచ్చాడు.

ప్రపంచంలోని గొప్ప క్రికెట్ బ్రెయిన్లలో ధోనీ ఒకడన్న అగార్కర్.. ఇతర ఆటగాళ్లు అంచనా వేయలేకపోయినా.. ధోనీ పరిస్థితులకు తగ్గట్టుగా అంచనాలు వేస్తాడని.. టోర్నీ గడిచే కొద్దీ అతడి ఫామ్ కూడా మెరుగువతుందని అగార్కర్ స్పష్టం చేశాడు. వచ్చే శుక్రవారం ముంబై ఇండియన్స్‌తో చెన్నై సూపర్ కింగ్స్ తలపడనుంది.