IPL 2020 Super Overs: పంజాబ్ చేసిన తప్పే చేసి.. ఓడిన ముంబై ఇండియన్స్

ఐపీఎల్ 2020లో ఇప్పటి వరకూ 10 మ్యాచ్‌లు జరగ్గా.. అందులో రెండు మ్యాచ్‌లు టైగా ముగిసి సూపర్ ఓవర్‌కు దారి తీసింది. పంజాబ్, ఢిల్లీ జట్ల మధ్య జరిగిన ఐపీఎల్ రెండో మ్యాచ్‌లో.. ఢిల్లీ క్యాపిటల్స్ 157 రన్స్ చేయగా.. మయాంక్ అగర్వాల్ (60 బంతుల్లో 89) ఒంటరి పోరాటంతో పంజాబ్‌ను గెలిపించినంత పని చేశాడు. కానీ 19.5వ ఓవర్లో భారీ సిక్స్‌కు యత్నించి ఔటయ్యాడు. ఆఖరి బంతికి జోర్డాన్ ఔటవడంతో మ్యాచ్‌ టై కాగా.. సూపర్ ఓవర్లో ఢిల్లీ విజయం సాధించింది.

ఇక బెంగళూరు, ముంబై జట్ల మధ్య జరిగిన మ్యాచ్‌లో.. ముందుగా బ్యాటింగ్ చేసిన ఆర్సీబీ 201 పరుగులు చేయగా.. ముంబై కూడా సరిగ్గా అంతే స్కోరు చేసింది. ముంబై 78 పరుగులకే 4 కీలక వికెట్లు కోల్పోయింది. కానీ లెఫ్ట్ హ్యాండర్ ఇషాన్ కిషన్ (58 బంతుల్లో 99; 2x4, 9x6) అద్భుత బ్యాటింగ్‌తో అదరగొట్టాడు. ఆఖర్లో పోలార్డ్ (24 బంతుల్లో 60 నాటౌట్) విజృంభించి మ్యాచ్‌ను ముంబై వైపు మొగ్గేలా చేశాడు. కానీ 19.5వ ఓవర్లో సిక్స్‌కు యత్నించిన కిషన్ 99 రన్స్ వద్ద ఔటయ్యాడు. తర్వాతి బంతికి పోలార్డ్ ఫోర్ బాదడంతో స్కోర్లు సమం అయ్యాడు. సూపర్ ఓవర్లో కోహ్లి సేన గెలుపొందింది.

సూపర్ ఓవర్ విషయంలో పంజాబ్, ముంబై ఒకే రకమైన తప్పిదం చేశాయి. అప్పటి వరకూ భీకరమైన షాట్లు ఆడిన మయాంక్‌ను సూపర్ ఓవర్లో బ్యాటింగ్‌కు దింపని పంజాబ్ మూల్యం చెల్లించుకోగా.. ముంబై కూడా సూపర్ ఓవర్లో ఇషాన్ కిషన్‌ను ఆడించకుండా తప్పు చేసింది.

ఇషాన్ కిషన్ అలసిపోయి, చెమట కారణంగా అసౌకర్యంగా ఉండటంతో.. అతడి బదులు హార్దిక్ పాండ్య బరిలో దింపినట్లు మ్యాచ్ అనంతరం రోహిత్ శర్మ తెలిపాడు. కానీ ఇదే మ్యాచ్ ఫలితాన్ని ప్రభావితం చేసింది. ‘‘చెమటతో ఇబ్బంది పడుతుంటే.. ఆ టీ షర్ట్ తీసేసి మరొకటి వేసుకొని.. చేతుల గ్లౌవ్స్ మార్చయినా సరే ఇషాన్‌‌‌ను పంపాల్సింది. ఆడేది ఆరు బంతులే కావడంతో అదేమంత కష్టం కాదు. ఒక్కసారి గ్రౌండ్‌లోకి అడుగుపెడితే అవేవీ గుర్తుకు రావు. లెఫ్ట్ హ్యాండర్ అయిన ఇషాన్ కిషన్ కచ్చితంగా ప్లస్ అయ్యేవాడు. సాధించాల్సింది 8 రన్సే కావడంతో కోహ్లి బరిలో దిగాడు. కానీ లక్ష్యం ఎక్కువగా ఉంటే కచ్చితంగా ఎడమ చేతి వాటం బ్యాట్స్‌మెన్‌ను బరిలో దింపేవాడు’’ అని కామెంటేటర్లు సునీల్ గావస్కర్, పీటర్సన్ అభిప్రాయపడ్డారు.