Yuzvendra Chahal బౌలింగ్‌లో యువరాజ్ సింగ్ 6, 6, 6.. ఔట్

రాయల్ ఛాలెంజర్స్ బెంగళూరుతో చిన్నస్వామి స్టేడియం వేదికగా గురువారం జరుగుతున్న ఐపీఎల్ మ్యాచ్‌లో ముంబయి ఇండియన్స్ హిట్టర్ యువరాజ్ సింగ్ (23: 12 బంతుల్లో 3x6) హ్యాట్రిక్ సిక్సర్లతో చెలరేగాడు. ఇన్నింగ్స్ 14వ ఓవర్ వేసిన స్పిన్నర్ చాహల్ బౌలింగ్‌లో తొలి మూడు బంతుల్ని వరుసగా 6, 6, 6‌గా మలిచిన యువరాజ్.. నాలుగో బంతిని కూడా సిక్స్‌గా తరలించే ప్రయత్నంలో.. బౌండరీ లైన్ వద్ద ఫీల్డర్ మహ్మద్ సిరాజ్ చేతికి చిక్కాడు. సిక్స్‌గా వెళ్తున్న బంతిని.. సిరాజ్ చక్కగా గాల్లోకి ఎగిరి అందుకున్నాడు.

రోహిత్ శర్మ (48: 33 బంతుల్లో 8x4, 1x6), హార్దిక్ పాండ్య (32 నాటౌట్: 14 బంతుల్లో 2x4, 3x6) చెలరేగడంతో టాస్ ఓడి తొలుత బ్యాటింగ్ చేసిన ముంబయి ఇండియన్స్‌ నిర్ణీత 20 ఓవర్లలో 8 వికెట్ల నష్టానికి 187 పరుగులు చేయగా.. ఛేదనలో బెంగళూరు హిట్టర్ ఏబీ డివిలియర్స్ (70 నాటౌట్: 41 బంతుల్లో 4x4, 6x6) మెరుపు ఇన్నింగ్స్ ఆడినా.. జట్టుని గెలిపించలేకపోయాడు. దీంతో.. బెంగళూరు ఆఖరికి 181/5కే పరిమితమైంది.