గొడవపడిన కోల్‌కతా కెప్టెన్, ముంబయి బౌలర్ మ్యాచ్ ఫీజులో కోత

ఐపీఎల్ 2023 సీజన్‌లో క్రమశిక్షణ తప్పిన కోల్‌కతా నైట్‌రైడర్స్ కెప్టెన్ నితీశ్ రాణా, ముంబయి ఇండియన్స్ స్పిన్నర్ హృతిక్ షూకెన్‌కి శిక్ష పడింది. ఆదివారం వాంఖడే వేదికగా ముంబయి, కోల్‌కతా మధ్య మ్యాచ్ జరిగింది. ఈ మ్యాచ్‌లో నితీశ్ రాణా వికెట్ తీసిన హృతిక్ తొలుత నోరు జారాడు. దాంతో పెవిలియన్‌కి వెళ్తున్న నితీశ్ రాణా వెనక్కి వచ్చి మరీ గొడవ పెట్టుకున్నాడు. అయితే.. ఈ ఇద్దరికి ముంబయి ఇండియన్స్ తాత్కాలిక కెప్టెన్ సూర్యకుమార్ యాదవ్, సీనియర్ స్పిన్నర్ పీయూస్ చావ్లా సర్దిచెప్పి పంపించారు. నితీశ్ రాణా, హృతిక్ షూకెన్‌ దేశవాళీ క్రికెట్‌లో ఢిల్లీ జట్టుకి కలిసే ఆడుతున్నారు. కానీ.. ఇద్దరి మధ్య గత కొంతకాలంగా కోల్డ్ వార్ నడుస్తున్నట్లు తెలుస్తోంది. ఇండియన్ ప్రీమియర్ లీగ్ (ఐపీఎల్) నియామవళిని ఉల్లఘింస్తూ మైదానంలో బూతులు తిట్టుకున్న నితీశ్ రాణా, హృతిక్ షూకెన్‌కి మ్యాచ్ ఫీజులో కోత పడింది. తొలుత నోరుజారిన హృతిక్ షూకెన్‌ మ్యాచ్ ఫీజులో 10% కోత పడగా.. గొడవని పెద్దది చేసిన నితీశ్ రాణా మ్యాచ్ ఫీజులో 25% కోత పడింది. ఈ మ్యాచ్‌లో చివరికి ముంబయి ఇండియన్స్ 5 వికెట్ల తేడాతో విజయాన్ని అందుకుంది.

మ్యాచ్‌లో టాస్ ఓడి మొదట బ్యాటింగ్ చేసిన కోల్‌క‌తా నైట్‌రైడర్స్ టీమ్.. వెంకటేశ్ అయ్యర్ (104) సెంచరీ బాదడంతో 6 వికెట్ల నష్టానికి 185 పరుగులు చేసింది. నితీశ్ రాణా 10 బంతుల్లో 5 పరుగులే చేసి హృతిక్ షూకెన్‌ బౌలింగ్‌లో సబ్‌స్టిట్యూట్ ఫీల్డర్ రమణదీప్ సింగ్‌కి క్యాచ్ ఇచ్చి ఔటయ్యాడు. మ్యాచ్‌లో హృతిక్ షూకెన్‌ 4 ఓవర్లు వేసి 34 పరుగులు ఇచ్చినా.. నితీశ్ రాణాతో పాటు శార్ధూల్ ఠాకూర్ (13) వికెట్‌ని కూడా అతను పడగొట్టాడు.