ఐపీఎల్ జరపొద్దంటూ.. ఐపీఎస్ పిల్

ఐపీఎల్ మ్యాచ్‌లు నిర్వహించకుండా ఆదేశాలివ్వాలని సీనియర్ ఐపీఎస్ అధికారి జి.సంపత్ కుమార్ మద్రాస్ హైకోర్టును కోరారు. బెట్టింగ్, స్పాట్ ఫిక్సింగ్‌లను అడ్డుకునేలా బీసీసీఐ తగిన చర్యలు చేపట్టే వరకు ఐపీఎల్ నిర్వహించొద్దని ఆయన ప్రజా ప్రయోజన వ్యాజ్యం దాఖలు చేశారు. ఐపీఎల్ ఆడుతున్న 8 జట్లను ఆయన ప్రతివాదులుగా చేర్చారు.

విచారణ అధికారిగా గతంలో ఐపీఎల్ బెట్టింగ్ భాగోతాన్ని వెలుగులోకి తీసుకొచ్చానని సంపత్ తెలిపారు. కాగా బుకీల నుంచి ముడుపులు తీసుకున్నారనే ఆరోపణలతో తమిళనాడు క్యూ బ్రాంచ్ ఎస్పీగా ఉన్న ఆయనపై నాలుగేళ్లపాటు సస్పెన్షన్ వేటు వేశారు. కానీ అవన్నీ నిరాధారమైనవిగా తేలడంతో.. ఆయన తిరిగి బాధ్యతలు చేపట్టారు. ఆయన వెలుగులోకి తెచ్చిన బుకింగ్ స్కామ్‌లో పలువురు ప్రముఖ క్రికెటర్ల పేర్లు వెలుగులోకి వచ్చాయి.

‘నేను ఐపీఎల్‌ను నిషేధించాలని కోరడం లేదు. కానీ బెట్టింగ్‌కు ఆస్కారం లేకుండా చూడాలని కోరుతున్నాను. ఈ విషయంలో బీసీసీఐ చర్యలు తీసుకునేవరకు మ్యాచ్‌లను నిర్వహించొద్దు’ అని ఆయన న్యాయస్థానాన్ని కోరారు.