RCB అభిమానులకు బ్యాడ్ న్యూస్.. బెంగళూరులో భారీ వర్షం.. మ్యాచ్ డౌటే..?

రాయల్ ఛాలెంజర్స్ బెంగళూరు అభిమానులు బ్యాడ్ న్యూస్. బెంగళూరు నగరంలో వర్షం కురుస్తోంది. ఆదివారం మధ్యాహ్నమే వర్షం మొదలైంది. ఒక వేళ వర్షం రాత్రి కూడా కురిస్తే.. గుజరాత్ టైటాన్స్‌తో మ్యాచ్‌పై ప్రభావం పడనుంది. ఒక వేళ వర్షంతో మ్యాచ్ రద్దయితే బెంగళూరు ప్లేఆఫ్స్ అవకాశాలపై తీవ్ర ప్రభావం పడుతుంది. దీంతో ఆర్సీబీ ఆటగాళ్లతోపాటు ఫ్యాన్స్‌లో కలవరం మొదలైంది. నగరంలో భారీ వర్షం కురుస్తోందని బెంగళూరు వాసులు ట్విట్టర్ ద్వారా వెల్లడిస్తున్నారు. వర్షం కురుస్తోన్న వీడియోలను సోషల్ మీడియాలో పోస్టు చేస్తున్నారు.
హోస్కేటే, విజయపుర పట్టణాలతోపాటు దేవనహళ్లి, బుడిగెరె పరిసర ప్రాంతాల్లో తీవ్రమైన గాలులు వీస్తున్నాయని.. ఇవి ఉత్తర, తూర్పు బెంగళూరు దిశగా కదులుతున్నాయని కర్ణాటక వెదర్ మ్యాన్ తెలిపారు. మరో గంటలో బెంగళూరు నగరంలో ఉరుములు, మెరుపులతో కూడిన వర్షాలు, వడగండ్లు కురుస్తాయన్నారు. బెంగళూరులోని కొన్ని ప్రాంతాల్లో తీవ్రమైన గాలులు వీస్తాయన్నారు. కేఆర్‌ పుర, వైట్ ఫీల్డ్ ప్రాంతాల్లో ముందుగా వర్షం మొదలవుతుందన్నారు. ఆదివారం సాయంత్రం నుంచి రాత్రి వరకు బెంగళూరు నగరంలో వర్షం కురుస్తుందని ఆయన ఇంతకు ముందే హెచ్చరించారు.
వర్షం కారణంగా బెంగళూరు, గుజరాత్ మధ్య మ్యాచ్ రద్దయితే.. ఇరు జట్లకు చెరో పాయింట్ కేటాయిస్తారు. అప్పుడు ఆర్సీబీ ఖాతాలో 15 పాయింట్లు చేరతాయి. ఒకవేళ సన్‌రైజర్స్‌పై ముంబై గెలిచి, బెంగళూరులో మ్యాచ్ రద్దయితే.. రోహిత్ సేన ప్లేఆఫ్స్‌కు చేరుకుంటుంది. దీంతో డక్ వర్త్ లూయిస్ పద్ధతి ప్రకారం కొద్ది ఓవర్లపాటైనా మ్యాచ్ సాగాలని ఆర్సీబీ ఫ్యాన్స్ కోరుకుంటున్నారు.