IPL 2020: రషీద్ ఖాన్‌ ముప్పుతిప్పలు పెట్టాడు.. బాబోయ్ కష్టం: RCB ఓపెనర్

ఐపీఎల్ 2020 సీజన్‌‌లో సన్‌రైజర్స్ హైదరాబాద్ స్పిన్నర్ రషీద్ ఖాన్‌ని ఎదుర్కోవడం తనకి శక్తికి మించిన పనైందని రాయల్ ఛాలెంజర్స్ బెంగళూరు ఓపెనర్ దేవదత్ పడిక్కల్ వెల్లడించాడు. ఐపీఎల్‌‌‌లో తొలిసారి ఆడినప్పటికీ.. ఐదు హాఫ్ సెంచరీలు బాదిన పడిక్కల్ మొత్తం 473 పరుగులతో ఆ టీమ్‌లో టాప్ స్కోరర్‌గా నిలిచాడు. ఫాస్ట్ బౌలర్లని సమర్థంగా ఎదుర్కొన్న ఈ ఎడమచేతి వాటం ఓపెనర్.. రషీద్ ఖాన్ బౌలింగ్‌లో తడబడటానికి గల కారణాన్ని తాజాగా ఈఎస్‌పీఎన్ క్రిక్‌ఇన్ఫోకి ఇచ్చిన ఇంటర్వ్యూలో వెల్లడించాడు.

‘‘దేశవాళీ క్రికెట్‌‌‌లో ఫాస్ట్ బౌలర్లని రెగ్యులర్‌గా ఎదుర్కొంటాను కాబట్టి.. ఐపీఎల్ 2020 సీజన్‌లో పేసర్ల నుంచి నాకు ఎలాంటి సవాళ్లు ఎదురుకాలేదు. కానీ.. టోర్నీలో రషీద్ ఖాన్ బౌలింగ్‌ని ఎదుర్కోవడం నాకు ఛాలెంజ్‌గా అనిపించింది. దానికి కారణం అతని బౌలింగ్‌లో పేస్‌‌‌తో పాటు టర్న్ ఉండటమే. దాంతో.. రషీద్ బౌలింగ్‌లో స్వేచ్ఛగా ఆడే సాహసం చేయలేకపోయా. అతని ప్రతి ఓవర్‌లోనూ ఏదో ప్రత్యేకత ఉండేది’’ అని పడిక్కల్ వెల్లడించాడు.

ఫాస్ట్ బౌలర్ల యాక్షన్‌‌ని పోలి ఉండే రషీద్ ఖాన్.. అదును చూసి గూగ్లీని సంధించేవాడు. దాంతో.. ప్రతి బంతికీ.. బ్యాట్స్‌మెన్.. లెగ్ స్పిన్ అవుతోందా..? లేదా గూగ్లీ పడిందా..? అనే డబుల్ మైండ్‌లో ఆడాల్సి వచ్చేది. ఐపీఎల్ 2020 సీజన్‌లో 15 మ్యాచ్‌లాడిన రషీద్ ఖాన్ 20 వికెట్లు పడగొట్టగా.. అతని బౌలింగ్ ఎకానమీ ఓవర్‌కి 5.37గా ఉండటం గమనార్హం.