IPL 2022 Playoffs‌కి చేరిన జట్లు, షెడ్యూల్ ఇదే.. ఫైనల్ టైమింగ్స్ మార్పు

ఐపీఎల్ 2022 సీజన్ ప్లేఆఫ్స్ బెర్తులపై పూర్తి స్థాయిలో క్లారిటీ వచ్చేసింది. శనివారం రాత్రి వాంఖడే వేదికగా ఢిల్లీ క్యాపిటల్స్‌తో జరిగిన మ్యాచ్‌లో 5 వికెట్ల తేడాతో ముంబయి ఇండియన్స్ గెలిచింది. దాంతో.. ప్లేఆఫ్స్ రేసు నుంచి నిష్క్రమించిన ఢిల్లీ క్యాపిటల్స్ ఇంటిబాట పట్టగా.. రాయల్ ఛాలెంజర్స్ బెంగళూరు టీమ్‌ ప్లేఆఫ్స్‌కి చేరేందుకు లైన్ క్లియరైంది. మొత్తంగా.. గుజరాత్ టైటాన్స్, రాజస్థాన్ రాయల్స్, లక్నో సూపర్ జెయింట్స్, రాయల్ ఛాలెంజర్స్ బెంగళూరు జట్లు ప్లేఆఫ్స్‌కి చేరాయి. ఈరోజుతో ఐపీఎల్ 2022 సీజన్ లీగ్ దశ మ్యాచ్‌లు ముగియనుండగా.. మంగళవారం నుంచి ప్లేఆఫ్స్‌ మ్యాచ్‌లకి తెరలేవనుంది. పాయింట్ల పట్టికలో టాప్-2లో ఉన్న గుజరాత్ టైటాన్స్, రాజస్థాన్ రాయల్స్ మధ్య మంగళవారం రాత్రి 7.30 గంటలకి కోల్‌కతాలోని ఈడెన్ గార్డెన్స్ వేదికగా క్వాలిఫయర్-1 మ్యాచ్ జరగనుండగా.. పట్టికలో నెం.3, నెం.4లో ఉన్న లక్నో సూపర్ జెయింట్స్, రాయల్ ఛాలెంజర్స్ బెంగళూరు మధ్య అక్కడే బుధవారం రాత్రి 7.30 గంటలకి ఎలిమినేటర్ మ్యాచ్ జరగనుంది.

క్వాలిఫయర్-1లో గెలిచిన టీమ్ నేరుగా ఫైనల్‌కి అర్హత సాధించనుండగా.. ఓడిన జట్టుకి ఫైనల్‌కి చేరేందుకు క్వాలిఫయర్-2 మ్యాచ్‌లో ఆడటం ద్వారా మరో అవకాశం ఉంటుంది. కానీ.. ఎలిమినేటర్ మ్యాచ్‌లో ఓడిన టీమ్ ఇంటిబాట పట్టనుండగా.. ఎలిమినేటర్‌లో గెలిచిన టీమ్, క్వాలిఫయర్-1లో ఓడిన టీమ్ మధ్య శుక్రవారం క్వాలిఫయర్-2 మ్యాచ్ జరగనుంది. ఈ మ్యాచ్‌లో గెలిచిన జట్టు ఆదివారం ఫైనల్లో ఆడనుంది. అహ్మదాబాద్‌లోని నరేంద్ర మోడీ స్టేడియంలో మే 29 (ఆదివారం) ఫైనల్ మ్యాచ్ జరగనుంది. క్వాలిఫయర్-1, ఎలిమినేటర్, క్వాలిఫయర్-2 మ్యాచ్‌లు రాత్రి 7.30 గంటలకి ప్రారంభంకానుండగా.. ఫైనల్ మాత్రం రాత్రి 8 గంటలకి స్టార్ట్‌కానుంది.