బ్యాటర్ల దారుణ వైఫల్యం..
సన్రైజర్స్ బ్యాటర్లు ఈ సీజన్లో దారుణంగా విఫలమయ్యారు. అత్యధిక పరుగులు చేసిన ఆటగాళ్ల జాబితాలో టాప్-20లో ఒక్క క్లాసేన్ మాత్రమే నిలిచాడు. రూ.13.25 కోట్లు పెట్టి కొనుగోలు చేసిన హ్యారీ బ్రూక్.. అత్యంత పేలవ ప్రదర్శనతో నిరాశపర్చాడు. 9 మ్యాచ్‌లు ఆడిన అతడు 20.38 యావరేజ్, 121.64 స్ట్రయిక్ రేట్‌తో 163 రన్స్ చేశాడు. కోల్‌కతా నైట్‌రైడర్స్‌‌పై సెంచరీ మినహాయిస్తే.. అతడు ఒక్క మ్యాచ్‌లోనూ ఆకట్టుకోలేకపోయాడు. కెప్టెన్ మార్‌క్రమ్ బ్యాట్‌తో సత్తా చాటలేకపోయాడు. 11 మ్యాచ్‌ల్లో అతడు 21.70 యావరేజ్‌తో 217 రన్స్ మాత్రమే చేయగలిగాడు. వీరిద్దరూ దారుణంగా విఫలం కావడం సన్రైజర్స్ అవకాశాలను దెబ్బతీసింది. రాహుల్ త్రిపాఠి, మయాంక్ అగర్వాల్ కూడా తేలిపోయారు.
ఆకట్టుకోలేకపోయిన బౌలర్లు
సన్రైజర్స్ ఐపీఎల్‌లోకి అడుగుపెట్టిన నాటి నుంచి ఆ జట్టు ప్రధాన బలం బౌలింగ్ విభాగం. బ్యాటర్లు 130 పరుగులు చేసినా డిఫెండ్ చేయగల సత్తా సన్రైజర్స్ బౌలర్ల సొంతం. కానీ ఈ సీజన్లో హైదరాబాద్ బౌలర్లు ఏమాత్రం ప్రభావం చూపలేకపోయారు. ఒక్క బౌలర్‌ కూడా అత్యధిక వికెట్లు తీసిన బౌలర్ల జాబితాలో టాప్-10లో నిలువలేకపోయాడు. గుజరాత్ టైటాన్స్‌పై ఐదు వికెట్లు తీయడంతో భువనేశ్వర్ కుమార్ మాత్రం 12వ స్థానానికి ఎగబాకాడు. పొదుపుగా బౌలింగ్ చేస్తారని పేరున్న సన్రైజర్స్ బౌలర్లు ఈ సీజన్లో ధారాళంగా పరుగులిచ్చారు. భువీ 8.16, జాన్సెన్ 9.88, నటరాజన్ 9.17, ఉమ్రాన్ మాలిక్ 10.35, ఫజల్‌హక్ ఫరూఖీ 8.77 ఎకానమీతో పరుగులు ఇచ్చుకున్నారు. ఒక్క మయాంక్ మార్కండే మాత్రమే 7.89 యావరేజ్‌తో 10 మ్యాచ్‌ల్లో 12 వికెట్లు తీశాడు.
గెలవాల్సిన మ్యాచ్‌ల్లో ఓటమి..
గెలవాల్సిన మ్యాచ్‌ల్లోనూ ఓడిపోవడం సన్రైజర్స్ ప్లేఆఫ్స్ అవకాశాలను దెబ్బతీసింది. ఢిల్లీ క్యాపిటల్స్, లక్నో సూపర్ జెయింట్స్, కోల్‌కతా నైట్ రైడర్స్‌తో మ్యాచ్‌ల్లో గెలిచే పొజిషన్లో ఉన్నప్పటికీ.. అనూహ్యంగా తడబడిన హైదరాబాద్ ఓటమిపాలైంది. ఉప్పల్ వేదికగా లక్నోతో జరిగిన మ్యాచ్‌లో చివరి ఏడు ఓవర్లలో సూపర్ జెయింట్స్ విజయానికి 90కిపైగా పరుగులు అవసరం కాగా.. 16వ ఓవర్ పార్ట్ టైం స్పిన్నర్ అభిషేక్ శర్మతో బౌలింగ్ చేయించాలన్న కెప్టెన్ మార్క్‌క్రమ్ నిర్ణయం కొంప ముంచింది. ఆ ఓవర్లో 31 పరుగులు రావడంతో... లక్నో మరో 4 బంతులు మిగిలి ఉండగానే విజయం సాధించింది. ఢిల్లీతో మ్యాచ్‌లో 12వ ఓవర్ వరకు చేతిలో 8 వికెట్లు ఉన్నప్పటికీ 145 పరుగుల లక్ష్యాన్ని చేధించలేకపోయింది. ఆఖరి ఓవర్లో 13 పరుగులు చేయలేక ఓటమిపాలైంది. కోల్‌కతాతో మ్యాచ్‌లోనై సన్రైజర్స్ విజయానికి 30 బంతుల్లో 38 పరుగులు అవసరమయ్యాయి. చేతిలో 5 వికెట్లు ఉన్నాయి. కానీ మార్‌క్రమ్ సహా బ్యాటర్లు విఫలయ్యారు. దీంతో చివరి ఓవర్లో 9 పరుగులు కూడా చేయలేక చతికిలపడింది.
కోచింగ్ స్టాఫ్ ఏం చేస్తున్నట్టు..?
సన్రైజర్స్ చివరి మ్యాచ్ వరకూ ప్లేయింగ్ ఎలెవన్ విషయంలో ఓ నిర్ణయానికి రాలేకపోయింది. అద్భుతమైన హిట్టింగ్‌తో రాజస్థాన్ రాయల్స్‌పై గెలిపించిన గ్లెన్ ఫిలిప్స్‌ను గుజరాత్‌తో మ్యాచ్‌లో పక్కనబెట్టారు. పదే పదే విఫలమైనా సరే రాహుల్ త్రిపాఠి లాంటి ఆటగాళ్లను ఆడించారు. ఆటగాళ్లు ఇంత దారుణ ప్రదర్శన చేస్తుంటే కోచింగ్ స్టాఫ్ ఏం చేస్తున్నారనేది అంతుపట్టని రహస్యం. గుజరాత్‌తో మ్యాచ్‌లో సన్రైజర్స్ ఓటమి అంచున ఉన్న సమయంలో.. బ్యాటింగ్ కోచ్ బ్రియాన్ లారా డగౌట్‌లో కూర్చొని నవ్వుతుండటం అభిమానులకు ఆగ్రహం తెప్పించింది. ఆటగాళ్లలో స్థైర్యం నింపే ప్రయత్నం జరిగినట్లు ఎక్కడా కనిపించడం లేదు. ఈ సీజన్లో ఓవరాల్‌‌గా చూస్తే సన్రైజర్స్ జట్టు మొత్తంలో ఆకట్టుకున్నది ఇద్దరే ఇద్దరు. ఒకరు క్లాసేన్ కాగా.. మరొకరు మయాంక్ మార్కండే. 11 మందిలో ఒకరిద్దరే రాణించే జట్టు నుంచి ఇంతకు మించి ఇంకేం ఆశించగలం...?