Glenn Maxwell: 108 రన్స్ చేసినోడు.. రూ.14.25 కోట్లు పలికాడు.. వార్నర్‌కు మైండ్ బ్లాంక్!

ఐపీఎల్ 2021 వేలంలో గ్లెన్ మ్యాక్స్‌వెల్‌ను రాయల్ ఛాలెంజర్స్ బెంగళూరు రూ.14.25 కోట్లకు కొనుగోలు చేసిన సంగతి తెలిసిందే. గత సీజన్లో పేలవ ప్రదర్శన చేయడంతో.. కింగ్స్ ఎలెవన్ పంజాబ్ జట్టు మ్యాక్సీని రిలీజ్ చేసింది. ఐపీఎల్ 2020లో పంజాబ్ వరుసబెట్టి అవకాశాలు ఇచ్చినప్పటికీ.. 108 రన్స్ మాత్రమే చేసిన మ్యాక్స్‌వెల్ ఒక్క సిక్స్ కూడా బాదలేకపోయాడు.
కోల్‌కతాతో జరిగిన మ్యాచ్‌లో ఆఖరి బంతికి సిక్స్ కొడితే పంజాబ్ గెలిచే అవకాశం ఉండగా.. మ్యాక్సీ ఫోర్ మాత్రమే బాదడంతో.. జట్టు ఓడింది. గత సీజన్లో ఈ ఆసీస్ హిట్టర్ తీవ్రంగా నిరాశపర్చినప్పటికీ.. అతడిపై కోహ్లి నమ్మకం ఉంచాడు. ఎవరూ ఊహించని రీతిలో ఆర్సీబీ అతడికి రూ.14.25 కోట్లు ఆఫర్ చేయడం పట్ల సహచర ఆస్ట్రేలియా క్రికెటర్ డేవిడ్ వార్నర్ ఆశ్చర్యం వ్యక్తం చేశాడు.

ఆస్ట్రేలియా, న్యూజిలాండ్ మధ్య జరిగిన తొలి టీ20 సందర్భంగా ఫాక్స్ క్రికెట్ తరఫున వార్నర్ కామెంటేటర్‌గా వ్యవహరించాడు. మ్యాక్స్‌వెల్ బౌలింగ్ చేస్తుండగా.. వార్నర్ ఐపీఎల్ వేలం ప్రస్తావన తీసుకొచ్చాడు. ఐపీఎల్ వేలంలలో మ్యాక్స్‌వెల్‌కు కచ్చితంగా బ్యాడ్ రిజల్ట్ రాలేదన్నాడు. గత సీజన్లో మ్యాక్సీ ప్రదర్శనను బట్టి చూస్తే.. అతడికి డబ్బు విషయంలో కచ్చితంగా మంచే జరిగిందని తోటి కామెంటేటర్ మార్క్ వా అభిప్రాయపడ్డాడు.

ఐపీఎల్ 2020లో పంజాబ్ అతణ్ని రిలీజ్ చేసినప్పటికీ.. వేలంలో మ్యాక్స్‌వెల్‌కు అంత కంటే ఎక్కువ మొత్తం దక్కడం పట్ల సన్‌రైజర్స్ కెప్టెన్ ఒకింత ఆశ్చర్యం వ్యక్తం చేశాడు. బాగా ఆడే సామర్థ్యం మ్యాక్స్‌వెల్‌కు ఉందని.. వచ్చే ఐపీఎల్ సీజన్లో అతడు అంచనాలను అందుకుంటాడని వార్నర్ అభిప్రాయపడ్డాడు.

గ్లెన్ మ్యాక్స్‌వెల్ ఐపీఎల్‌లో పెద్దగా రాణించకపోయినప్పటికీ.. గత మూడు సీజన్లలో రూ.34 కోట్లు ఆర్జించాడు. ఏటేటా అతడికి చెల్లించే మొత్తం పెరుగుతుందే గానీ తగ్గడం లేదు. 2018లో ఢిల్లీ క్యాపిటల్స్ అతడికి రూ.9 కోట్లు చెల్లించగా.. 2020లో కింగ్స్ ఎలెవన్ పంజాబ్ రూ.10.75 కోట్లు చెల్లించింది.