IPL 2020: రషీద్ ఖాన్ హిట్ వికెట్ కాదు.. క్యాచ్ ఔటే.. ఎందుకంటే..?

చెన్నై సూపర్ కింగ్స్‌తో జరిగిన మ్యాచ్‌లో శార్దుల్ ఠాకూర్ బౌలింగ్‌లో రషీద్ ఖాన్ హిట్ వికెట్‌గా వెనుదిరిగిన సంగతి తెలిసిందే. శార్దుల్ వేసిన యార్కర్‌ను భారీ షాట్‌గా మలవడం కోసం రషీద్ ఖాన్ బ్యాక్ ఫుట్ తీసుకున్నాడు. కానీ బంతిని బాదే క్రమంలో.. బూటు కాలితో వికెట్లను తన్నాడు. మరోవైపు బాల్ గాల్లోకి లేవడంతో.. లాంగ్ హాఫ్‌లో దీపక్ చాహర్ క్యాచ్ అందుకున్నాడు. దీంతో ఒకే బంతికి రషీద్ రెండు విధాలా ఔటైనట్లయ్యింది.

ముందుగా రషీద్ పాదం వికెట్లను తాకింది కాబట్టి.. హిట్ వికెట్ రూపంలో ఔటైనట్లు ప్రకటించారు. కానీ క్రికెట్ చట్టాల (ఎంసీసీ లాస్ ఆఫ్ క్రికెట్) మాత్రం మరో విధంగా ఉన్నాయి. లా 33.1 ప్రకారం బ్యాట్స్‌మెన్ బౌల్డ్ కాకుండా క్యాచ్ రూపంలో ఔటైతే.. మరో రూపంలో ఔటయినా క్యాచ్‌గానే పరిగణిస్తారు. కాబట్టి హిట్ వికెట్‌ కంటే క్యాచ్ ఔట్‌కే ప్రాధాన్యం ఇవ్వాలని నిబంధనలు స్పష్టం చేస్తున్నాయి.

ఈ సీజన్లో ముంబై ఇండియన్స్ క్రికెటర్.. హార్దిక్ పాండ్య హిట్ వికెట్ రూపంలో ఔటైన సంగతి తెలిసిందే. రషీద్ ఖాన్ కాకుండా.. ఐపీఎల్ చరిత్రలో ఇప్పటి వరకూ 11 మంది హిట్ వికెట్ రూపంలో ఔటయ్యారు.