IPL 2020: అతని లాంటి ఫినిషర్ చాలా అరుదు.. ధోనీ గురించి కాదు

ఐపీఎల్ 2020 సీజన్‌లో ముంబయి ఇండియన్స్ పవర్ హిట్టర్ హార్దిక్ పాండ్యా.. తిరుగులేని ఫినిషర్‌గా ఎదుగుతున్నాడు. ఇటీవల ఢిల్లీ క్యాపిటల్స్‌తో జరిగిన క్వాలిఫయర్-1 మ్యాచ్‌లో ఆఖర్లో వరుస సిక్సర్లు బాదిన హార్దిక్ పాండ్యా (37 నాటౌట్: 14 బంతుల్లో 5x6) ముంబయికి ఊహించని స్కోరుని అందించాడు. ఎంతలా అంటే.. ఇషాన్ కిషన్ (51 నాటౌట్: 38 బంతుల్లో 6x4, 2x6)తో కలిసి చివరి మూడు ఓవర్లలోనే హార్దిక్ పాండ్యా ఏకంగా 55 పరుగుల్ని రాబట్టాడు. దాంతో.. ఈ ఫినిషర్‌పై ఆస్ట్రేలియా మాజీ క్రికెటర్ టామ్ మూడీ ప్రత్యేకంగా మాట్లాడాడు.

‘‘హార్దిక్ పాండ్యా లాంటి ఫినిషర్ చాలా అరుదు. ఐపీఎల్ 2020 సీజన్‌లో అతను సూపర్ ఫామ్‌లో ఉన్నాడు. ఆ మ్యాచ్‌లో ముంబయి 170-175 స్కోరు చేసింటే.. ఫలితం వేరుగా ఉండేది. కానీ.. హార్దిక్ పాండ్యా కేవలం 14 బంతుల్లోనే మ్యాచ్ గమనాన్ని పూర్తిగా మార్చేశాడు. వాస్తవానికి ముంబయి టీమ్ 200 స్కోరు చేస్తుందని ఎవరూ ఊహించలేదు’’ అని ఆస్ట్రేలియా మాజీ క్రికెటర్ టామ్ మూడీ వెల్లడించాడు.

ఐపీఎల్ 2020 సీజన్‌లో 13 మ్యాచ్‌లాడిన హార్దిక్ పాండ్య 182.89 స్ట్రైక్‌రేట్‌తో 278 పరుగులు చేశాడు. ఇందులో 14 ఫోర్లు, 25 సిక్సర్లు ఉండగా.. ప్రతి మ్యాచ్‌లోనూ హార్దిక్‌ని 6-7 స్థానాల్లో ముంబయి బ్యాటింగ్‌కి పంపుతోంది. గత ఏడాది వెన్నుకి సర్జరీ చేయించుకున్న హార్దిక్ పాండ్యా.. ఈ ఏడాది ఫిబ్రవరి నుంచి భీకర హిట్టింగ్‌తో అదరగొట్టేస్తున్నాడు.