Team India: సూర్యకుమార్ యాదవ్‌ను సెలక్టర్లు పక్కనబెట్టడానికి కారణాలివేనా..?

ఐపీఎల్ 2020లో సత్తా చాటుతున్నప్పటికీ.. ముంబై ఇండియన్స్ బ్యాట్స్‌మెన్ సూర్యకుమార్ యాదవ్‌‌ను సెలక్టర్లు ఆస్ట్రేలియా పర్యటనకు పక్కనబెట్టారు. భారత టీ20 జట్టులో అతడికి చోటు ఖాయమని చాలా మంది భావించారు. కానీ అనూహ్యంగా సునీల్ జోషీ నాయకత్వంలోని సెలక్షన్ కమిటీ అతణ్ని పక్కనబెట్టింది. ఆ తర్వాత బెంగళూరుతో జరిగిన మ్యాచ్‌లో సూర్య (43 బంతుల్లో 79) అజేయ హాఫ్ సెంచరీతో తన జట్టును గెలిపించాడు. సూర్యకుమార్ యాదవ్‌ను పరిగణనలోకి తీసుకోకపోవడానికి కొన్ని కారణాలు ఉన్నాయని భావిస్తున్నారు.

ఈ ఏడాది ఆరంభంలో న్యూజిలాండ్‌లో పర్యటించిన ఇండియా-ఏ జట్టులో సూర్యకుమార్ యాదవ్‌కు ఆడే అవకాశం లభించింది. ఆ టూర్‌లో ఇండియా-ఏ తరఫున అన్ని మ్యాచ్‌ల్లోనూ సూర్య ఆడాడు. మూడు మ్యాచ్‌ల్లో న్యూజిలాండ్-ఏ కేవలం 76 రన్స్ మాత్రమే చేశాడు. మూడు లిస్ట్-ఏ మ్యాచ్‌ల్లో 60 పరుగులు చేశాడు. ఈ పర్యటనలో ఆకట్టుకొని ఉంటే.. ఆస్ట్రేలియా టూర్‌కు పిలుపు వచ్చి ఉండేది.

ఆస్ట్రేలియా పర్యటనకు జట్టును ప్రకటించడానికి ముందు సూర్య కుమార్ యాదవ్ ఐపీఎల‌్‌లో రెండు హాఫ్ సెంచరీలు మాత్రమే చేయగా.. ఐదు మ్యాచ్‌ల్లో 20లోపే రన్స్ చేయగలిగాడు. దీంతో సెలక్టర్లు అతడి కంటే సంజూ శాంసన్‌కు ప్రాధాన్యం ఇచ్చారు. రిషబ్ పంత్ లేకపోవడం కూడా శాంసన్‌కు కలిసొచ్చింది.

ఆస్ట్రేలియా టూర్‌కు జట్టును ఎంపిక చేయడానికి ముందు సూర్యకుమార్ మరిన్ని మ్యాచ్ విన్నింగ్ ఇన్నింగ్స్ ఆడి ఉండుంటే.. అతణ్ని ఎంపిక చేయకుండా ఉండలేని విధంగా పరిస్థితి మారేది.

సూర్యకుమార్ యాదవ్ ఏ స్థానంలోనైనా బ్యాటింగ్ చేయగల సమర్థుడు. కానీ భారత జట్టులో ఐదుగురి కంటే ఎక్కువ ఓపెనర్లు, మిడిలార్డర్ బ్యాట్స్‌మెన్ ఉన్నారు.

టీ20ల్లో రాహుల్, శిఖర్ ధావన్ ఓపెనర్లు బరిలో దిగే ఛాన్స్ ఉంది. వన్డేల్లో పోటీ తీవ్రంగా ఉండనుంది. తుది జట్టులోనే కాదు.. 15 మంది ఆటగాళ్లను ఎంపిక చేయకుండా కష్టంగా మారుతోంది. ప్రస్తుత పరిస్థితుల్లో సూర్యకుమార్ చేయగలిగేది ఒకటే. సాధ్యమైనన్ని ఎక్కువ పరుగులు చేయడం, టీమిండియాలో చోటు దొరికే అవకాశం కోసం ఎదురు చూడటం. కోచ్ రవిశాస్త్రి తన ‘సూర్య నమస్కార్’ ట్వీట్‌ ద్వారా పరోక్షంగా చెప్పింది కూడా ఇదే.