కుంబ్లే బౌలింగ్‌లో కంగారూలు విలవిల్లాడిన వేళ..

టీమిండియా కోచ్ పదవి నుంచి అనిల్ కుంబ్లే తప్పుకోవడంతో.. చాలా మంది క్రికెట్ అభిమానుల మనసు గాయపడింది. జట్టును విజయపథంలో నడిపిన కుంబ్లే మరి కొంత కాలం కోచ్‌గా కొనసాగి ఉంటే బాగుండేదనే అభిప్రాయం వ్యక్తమైంది. కొందరైతే కోహ్లిని విమర్శించారు కూడా. దీనంతటికీ కారణం క్రికెట్ పట్ల కుంబ్లేకున్న డెడికేషనే. తలకు గాయమైనా బౌలింగ్‌కు దిగడం, విదేశీ గడ్డ మీద కూడా పటిష్టమైన ఆసీస్‌ను ముప్పు తిప్పలు పెట్టడం.. టెయిలెండర్‌గా సెంచరీ బాదడం.. కుంబ్లే జట్టు కోసం చేసిందెంతో.. అందులో మచ్చుకు ఒక్కటి..

2004లో భారత క్రికెట్ జట్టు ఆసీస్ పర్యటనకు వెళ్లింది. సిడ్నీలో నాలుగో టెస్టు.. అది ఆ సిరీస్‌లో చివరి టెస్టు మ్యాచ్ మాత్రమే కాదు స్టీవ్ వాకు కూడా అదే ఆఖరి మ్యాచ్. ఆ మ్యాచ్‌లో ముందుగా బ్యాటింగ్ చేసిన భారత్ 705 పరుగుల భారీ స్కోరు సాధించింది. సచిన్ 241 పరుగులతో నాటౌట్‌గా నిలవగా.. లక్ష్మణ్ 178 రన్స్ చేశాడు. తర్వాత బ్యాటింగ్‌కు దిగిన ఆసీస్ దీటుగానే బదులిచ్చింది. ఓపెనర్లు జస్టిన్ లాంగర్ (117), హెడెన్ (67) తొలి వికెట్‌కు 147 పరుగుల భాగస్వామ్యం నెలకొల్పారు. ఈ దశలో బౌలింగ్‌కు దిగిన అనిల్ కుంబ్లే ఆసీస్ ఆటగాళ్లను తన స్పిన్ ఉచ్చులో బంధించాడు. జంబో దెబ్బకు విలవిల్లాడిన ఆసీస్ బ్యాట్స్‌మెన్ 474 పరుగులకు ఆలౌటయ్యారు.


తొలి ఇన్నింగ్స్‌లో 8 వికెట్లు తీసిన కుంబ్లే.. రెండో ఇన్నింగ్స్‌లోనూ 4 వికెట్లు కూల్చాడు. కానీ అప్పటికే ఐదు రోజుల ఆట ముగియడంతో ఆసీస్ డ్రాతో గట్టెక్కింది. ఈ మ్యాచ్‌లో భారత్ గెలవకపోయినా.. విదేశాల్లోనే అత్యుత్తమ బౌలింగ్ ప్రదర్శన కనబర్చిన కుంబ్లే భారత్‌ను గెలిపించడానికి శాయశక్తులా కృషి చేశాడు. ఆ సిరీస్ 1-1తో డ్రాగా ముగిసింది.