బ్యాట్ తగిలి.. హైదరాబాద్‌లో ఫీల్డర్ మృతి

క్రికెట్ ఆడుతూ ఆటగాళ్లు ప్రాణాలు కోల్పోతున్న ఘటనలు ఈ మధ్య క్రమంగా రెట్టింపవుతున్నాయి. కొన్ని వారాల క్రితం బంగ్లాదేశ్‌లో జరిగిన స్థానిక మ్యాచ్‌లో వికెట్ కీపర్ తలపై బ్యాట్స్‌మెన్ స్టంప్‌తో బలంగా కొట్టడంతో తీవ్రంగా గాయపడిన కీపర్ మృత్యువుతో పోరాడుతూ చనిపోయాడు. తాజాగా హైదరాబాద్‌లో జరిగిన ఓ స్థానిక మ్యాచ్‌లో బ్యాట్స్‌మెన్‌కు సమీపంలోని షార్ట్ లెగ్‌లో ఫీల్డింగ్ చేస్తున్న ఫీల్డర్ తలకి పొరపాటున బ్యాట్ తలగడంతో 22 ఏళ్ల కుర్రాడు మృతి చెందాడు.

బహదూర్‌పురలోని మిర్ అలమ్ ఈద్గ్ వద్ద ఆదివారం స్నేహపూర్వక మ్యాచ్‌ జరిగింది. ఈ మ్యాచ్‌లో బ్యాట్స్‌మెన్‌కి అతి సమీపంలో అబ్దుల్ వజీద్ అనే కుర్రాడు ఫీల్డింగ్ చేస్తుండగా.. హిట్టింగ్ చేసేందుకు క్రీజు వెలుపలికి వచ్చిన బ్యాట్స్‌మెన్ షాట్ కొట్టే ప్రయత్నంలో పొరపాటున వజీద్ తలపై కొట్టేశాడు. దీంతో తీవ్రంగా గాయపడిన వజీద్‌ని ఆసుపత్రికి తరలించగా.. చికిత్స పొందుతూ అతను బుధవారం మృతి చెందినట్లు బహదూర్‌పుర పోలీసులు వెల్లడించారు. సాధారణంగా షార్ట్ లెగ్‌లో ఫీల్డింగ్ చేసే ఫీల్డర్లు హెల్మెట్, రక్షణాత్మక వస్తువులు ధరిస్తారు. కానీ.. ఇది స్థానిక మ్యాచ్ కావడంతో ఫీల్డర్ అలాంటి జాగ్రత్తలు ఏమీ తీసుకోలేదని తెలుస్తోంది.