సచిన్ తొలి శతకం.. ఇంగ్లండ్‌లో ఇప్పటికీ రికార్డే

మాస్టర్ బ్లాస్టర్ సచిన్ టెండుల్కర్ పేరు చెబితే శతకాల శతకాలు గుర్తొస్తాయి. టెస్టులు, వన్డేలు కలుపుకొని వంద సెంచరీలు బాదాడు మాస్టర్. అలాంటి టెండుల్కర్ అంతర్జాతీయ మ్యాచ్‌లో తొలి సెంచరీ చేసింది ఆగష్టు 14నే. ఇంగ్లండ్ గడ్డ మీద 1990లో సరిగ్గా ఇదే రోజు సచిన్ తొలి శతకం బాదాడు. ఓల్డ్ ట్రాఫోర్డ్‌లో జరిగిన టెస్టులో అద్భుతంగా రాణించిన ఈ టీనేజీ కుర్రాడు.. ఓటమి గండం నుంచి జట్టును గటెక్కించాడు. దిగ్గజ క్రికెటర్లు తడబడినా.. ఇంగ్లిష్ బౌలర్లకు ఎదురు నిలిచాడు.

ఆ మ్యాచ్‌లో ఇంగ్లండ్ భారత్‌కు 408 పరుగుల భారీ లక్ష్యాన్ని నిర్దేశించింది. డెవాన్ మెక్‌కల్లమ్, అంగస్ ఫ్రేసర్, ఎడ్డీ హెమ్మింగ్స్ లాంటి బౌలర్లను ఎదుర్కోవడంలో భారత బ్యాట్స్‌మెన్ తడబడ్డారు. సిద్ధు డకౌట్ కాగా.. రవిశాస్త్రి 12 పరుగులు, సంజయ్ మంజ్రేకర్ 50 రన్స్ చేసిన పెవిలియన్ చేరారు. వెంగ్‌సర్కార్ కూడా 32 పరుగులకే అవుటయ్యాడు. 109 పరుగులకే 4 టాప్ ఆర్డర్ వికెట్లు కోల్పోయిన స్థితిలో బ్యాటింగ్‌కు వచ్చిన సచిన్ అద్భుతంగా రాణించాడు. 11 పరుగులు చేసిన కెప్టెన్ అజారుద్దీన్ అవుటైనా.. కపిల్‌తో కలిసి ఇన్నింగ్స్ ముందుకు నడిపించాడు. హెమ్మింగ్స్ రిటర్న్ క్యాచ్ వదలడంతో సచిన్‌కు లైఫ్ వచ్చింది. అది మొదలు అతడు వెనుదిరిగి చూడలేదు.. 189 బంతులను ఓపికగా ఎదుర్కొన్న సచిన్ 119 పరుగులతో నాటౌట్‌గా నిలిచాడు. 67 రన్స్‌తో మనోజ్ ప్రభాకర్ మాస్టర్‌కు అండగా నిలిచాడు. దీంతో మ్యాచ్ డ్రాగా ముగిసింది.

ఆ మ్యాచ్‌లో గవాస్కర్ ఇచ్చిన పాత ప్యాడ్లను కట్టుకుని సచిన్ బరిలో దిగిన సచిన్.. ఇంగ్లండ్‌ బౌలర్లపై ఆధిపత్యం చెలాయించాడు. 17 ఏళ్ల 112 రోజుల వయసులో సెంచరీ సాధించాడు. ఇంగ్లండ్ గడ్డ మీద సెంచరీ సాధించిన పిన్న వయస్కుడు సచినే కావడం విశేషం. ఇప్పటికీ ఆ రికార్డు చెక్కు చెదరలేదు. ప్రపంచ క్రికెట్లో సెంచరీ సాధించిన పిన్న వయస్కుడు పాక్‌కు చెందిన ముస్తాఖ్ మహ్మద్. అతడు 17 ఏళ్ల 80 రోజుల వయసులో శతకం బాదాడు.