శ్రీలంకపై మిథాలీ సేన ఉత్కంఠ గెలుపు..!

శ్రీలంకతో జరుగుతున్న మూడు వన్డే సిరీస్‌లో భారత్ మహిళల జట్టు వరుసగా రెండో విజయాన్ని నమోదు చేసింది. ఐసీసీ మహిళల ఛాంపియన్‌‌షిప్‌లో భాగంగా గాలేలో ఈ టోర్నీ జరుగుతుండగా.. గురువారం ఉత్కంఠగా ముగిసిన రెండో వన్డేలో భారత్ 7 పరుగుల తేడాతో గెలిచి సిరీస్‌‌‌ని 2-0తో కైవసం చేసుకుంది. ఇక నామమాత్రమైన మూడో వన్డే ఆదివారం జరగనుంది.

మ్యాచ్‌లో టాస్ గెలిచి తొలుత బ్యాటింగ్ చేసిన భారత జట్టు.. తనియా భాటియా (68: 66 బంతుల్లో 9x4), కెప్టెన్ మిథాలీ రాజ్ (52: 121 బంతుల్లో 4x4) అర్ధశతకాలు సాధించడంతో సరిగ్గా 50 ఓవర్లలో 219 పరుగులకి ఆలౌటైంది.

లక్ష్య ఛేదనలో చామరి ఆటపట్టు (57: 95 బంతుల్లో 8x4, 1x6), శశికళ (49: 91 బంతుల్లో 6x4), నీలాక్షి (31: 19 బంతుల్లో 2x4, 2x6) నిలకడగా ఆడటంతో శ్రీలంక అలవోక విజయాన్ని అందుకునేలా కనిపించింది. ముఖ్యంగా నీలాక్షి భారీ షాట్లతో ఒక్కసారిగా మ్యాచ్‌ను లంకవైపు తిప్పింది. ఆమె జోరుతో ఒకానొక దశలో 165/7తో నిలిచిన శ్రీలంక 46.3 ఓవర్లు ముగిసే సమయానికి 205/7తో విజయానికి చేరువలో నిలిచింది. కానీ.. జట్టు స్కోరు 207 వద్ద ఆమె ఔటవగా.. ఒత్తిడికి గురైన శ్రీలంక 48.2 ఓవర్లలో 211 పరుగులకే కుప్పకూలిపోయింది.