పది బంతుల్లో 8 వికెట్లు, బౌలర్ సంచలనం

క్రికెట్ మ్యాచ్‌లో ఓ బౌలర్ హ్యాట్రిక్ తీస్తే గ్రేట్ కదూ. వరుసగా ఐదు బంతుల్లో ఐదు వికెట్లు తీస్తే? అద్భుతమే కదా. అదే ఊపులో 10 బంతుల వ్యవధిలో 8 వికెట్లు తీస్తే..? కనీసం ఊహకు కూడా అందని విషయం కదూ. ఆస్ట్రేలియాలోని విక్టోరియాకు చెందిన క్లబ్ క్రికెటర్ నిక్ గూడెన్ సంచలన బౌలింగ్‌తో అత్యంత అరుదైన ఈ రికార్డును క్రియేట్ చేశాడు. ఆస్ట్రేలియా క్రికెటర్ జోష్ డన్‌స్టన్ వన్డే మ్యాచ్‌లో 40 సిక్సర్లు బాది 307 పరుగులు చేసిన సంగతి మరువక ముందే నిక్ ఈ రికార్డు నెలకొల్పడం విశేషం.

కుడిచేతి మీడియం పేసర్ అయిన గూడెన్ యాల్లౌర్న్ నార్త్ తరపున క్రికెట్ ఆడుతున్నాడు. దాదాపు 11 నెలల విరామం తర్వాత బంతి పట్టిన గూడెన్ శనివారం జరిగిన మ్యాచ్‌లో ఏకంగా ఆరుగుర్ని బౌల్డ్ చేశాడు. ఒకర్ని ఎల్బీగా పెవిలియన్ చేర్చాడు. మరొక బ్యాట్స్‌మెన్‌ను రనౌట్ చేశాడు. సెంట్రల్ గిప్స్‌లాండ్ క్రికెట్ కాంపిటీషన్లో లాట్రోబ్ జట్టుపై గూడెన్ ఈ ఘనత సాధించాడు.