అశ్విన్ మాయ.. శతకం ముంగిట ఔట్

భారత ఆఫ్ స్పిన్నర్ అశ్విన్ మాయ చేశాడు. దక్షిణాఫ్రికాతో సెంచూరియన్ వేదికగా జరుగుతున్న రెండో టెస్టులో అశ్విన్ విసిరిన బంతికి.. ఓపెనర్ ఐడిన్ మర్‌క్రమ్ (94: 150 బంతుల్లో 15x4) శతకం ముంగిట వికెట్ చేజార్చుకున్నాడు. ఇన్నింగ్స్ 48వ ఓవర్ వేసిన అశ్విన్.. ఆఫ్ స్టంప్‌కి దూరంగా బంతులు వేస్తూ మర్‌క్రమ్‌పై ఒత్తిడి పెంచాడు. దీంతో ఈ ఓపెనర్ పాయింట్ దిశగా బంతిని కట్ చేసేందుకు ప్రయత్నిస్తూ కీపర్ పార్థీవ్ పటేల్‌కి చిక్కాడు. దీంతో 148 పరుగుల వద్ద సఫారీ జట్టు రెండో వికెట్ కోల్పోయింది. తొలి వికెట్‌గా డీన్ ఎల్గర్‌(31)ని కూడా అశ్వినే ఔట్ చేయడం విశేషం.

సిరీస్‌లో తొలి శతకం సాధించేలా కనిపించిన మర్‌క్రమ్.. ఆఫ్ స్టంప్‌కి దూరంగా వెళ్తున్న బంతిని వెంటాడాడు. బంతి అతని బ్యాట్‌కి అంచున తాకి.. అనంతరం ఫ్యాడ్స్‌ని రాసుకుంటూ కీపర్ చేతుల్లోకి వెళ్లింది. భారత ఆటగాళ్లు అప్పీల్ చేయగా.. ఫీల్డ్ అంపైర్ ఔట్‌గా ప్రకటించాడు. అయితే.. ఈ నిర్ణయంపై అనుమానం వ్యక్తం చేసిన మర్‌క్రమ్ డీఆర్‌ఎస్ కోరగా.. వెంట్రుకవాసి తేడాతో బ్యాట్‌ని తాకుతూ బంతి వెళ్లినట్లు రిప్లైలో కనిపించింది. దీంతో నిరాశగా మర్‌క్రమ్ పెవిలియన్ బాట పట్టక తప్పలేదు. ఈ మ్యాచ్‌ని చూసేందుకు మర్‌క్రమ్ తల్లిదండ్రులతో పాటు అతని ప్రియురాలి కూడా వచ్చింది.