రహానె ఓ సైనికుడు.. సేవకై నిరీక్షిస్తున్నాడు

భారత జట్టు ఓపెనర్ అజింక్య రహానె సైనికుడు లాంటివాడు.. దేశం తరఫున క్రికెట్ ఆడేందుకు అనుక్షణం ఎదురుచూస్తుంటాడని అతని పర్సనల్ కోచ్ ప్రవీణ్ ఆమ్రే వెల్లడించాడు. ఇటీవల ఆస్ట్రేలియాతో టీ20 సిరీస్‌ కోసం ఎంపిక చేసిన జట్టు‌ నుంచి రహానె‌కి సెలక్టర్లు ఉద్వాసన పలికిన విషయం తెలిసిందే. గత ఆదివారం ఆసీస్‌తో ముగిసిన వన్డే సిరీస్‌లో రహానె వరుసగా నాలుగు అర్ధశతకాలు సాధించినా.. అతనికి టీ20 జట్టులో చోటు దక్కకపోవడంపై చాలా మంది మాజీ క్రికెటర్లు సైతం ఆశ్చర్యం వ్యక్తం చేశారు. ‘ఆసీస్‌తో వన్డేల్లో మెరుగ్గా రాణించిన రహానెని తప్పించి.. ఆ సిరీస్‌లో ఒక్క మ్యాచ్‌ కూడా ఆడని రాహుల్‌కి సెలక్టర్లు ఎందుకు అవకాశమిచ్చారో నాకు అర్థం కావడం లేదు’ అని దిగ్గజ క్రికెటర్ సునీల్ గవాస్కర్ పెదవి విరిచారు.

‘అజింక్య రహానె దేశానికి సేవ చేసేందుకు ఎల్లప్పుడూ సిద్ధంగా ఉండే సైనికుడులాంటి క్రికెటర్. తనని ఎప్పుడు జట్టులోకి ఎంపిక చేసినా.. ఆడేందుకు రెడీగా ఉంటాడు. అతను చాలా పరిణతితో ఆలోచిస్తాడు. టీ20 జట్టు నుంచి తనని తప్పించినప్పుడు అతను స్పందించిన విధానమే దానికి నిదర్శనం. సెలక్టర్ల ఎంపికని గౌరవిస్తానని చెప్పిన తీరులోనే అతనికి జట్టు‌లో తన స్థానంపై అభద్రతాభావం లేదని స్పష్టమవుతోంది. వాస్తవంగా వన్డేల్లో అలాంటి ప్రదర్శన చేసిన తర్వాత తప్పిస్తే.. ఆ స్థాయి క్రికెటర్ ఎవరైనా సెలక్టర్ల నిర్ణయం తప్పు లేదా ఒప్పు అని చెప్పేవాడు. కానీ.. రహానె అలా కాదు. ప్రస్తుతం నా శిష్యుడు త్వరలో న్యూజిలాండ్‌తో జరగబోయే వన్డే సిరీస్‌పై దృష్టి పెడుతున్నాడు’ అని ప్రవీణ్ ఆమ్రే వివరించాడు.