ఇంగ్లాండ్‌‌తో టెస్టు సిరీస్‌కు ముందు భారత్‌కు షాక్.. స్టార్ ఆల్‌రౌండర్ పూర్తిగా దూరం!

ఇంగ్లాండ్‌తో టెస్టు సిరీస్ ప్రారంభానికి ముందు భారత క్రికెట్‌కు షాక్ తగిలింది. ఆస్ట్రేలియా పర్యటనలో గాయపడిన ఆల్‌రౌండర్ రవీంద్ర జడేజా.. ఇంగ్లాండ్‌తో టెస్టు సిరీస్‌కు దూరం అవుతున్నాడు. పరిమిత ఓవర్ల సిరీస్‌లోనూ అతడు ఆడేది అనుమానంగా మారింది. ఆస్ట్రేలియాతో జరిగిన మూడో టెస్టులో గాయపడిన జడ్డేజా.. చివరి టెస్టుకు దూరమైన సంగతి తెలిసిందే.

బొటనవేలు ఫ్రాక్చర్ అయిన జడేజాకు ఆస్ట్రేలియాలోనే సర్జరీ నిర్వహించారు. జడ్డూకు కనీసం ఆరువారాల విశ్రాంతి అవసరమని బీసీసీఐ అధికారొకరు తెలిపారు. పరిమిత ఓవర్ల ఫార్మాట్లో అతడు ఆడేది లేదని సెలక్టర్లు తర్వాత నిర్ణయిస్తారని బీసీసీఐ అధికారి చెప్పారు.

గురువారం ఉదయం ఇతర టీమిండియా క్రికెటర్లతో కలిసి జడేజా భారత్‌ చేరుకున్నాడు. రిహాబిలిటేషన్ కోసం అతణ్ని నేషనల్ క్రికెట్ అకాడమీకి పంపనున్నారు. జడేజా విషయంలో బీసీసీఐ నుంచి అధికారిక ప్రకటన ఇంకా వెలువడాల్సి ఉంది. కానీ గతంలో అనుకున్న దాని కంటే ఎక్కువ సమయం అతడు దూరం అవనున్నాడు.

ఆసీస్‌తో టీ20 సిరీస్ సందర్భంగా.. జడేజా తొడ కండరాల గాయంతో ఇబ్బంది పడ్డాడు. అదే మ్యాచ్‌లో బంతి హెల్మెట్‌కు తాకడంతో కంకషన్‌కు గురయ్యాడు. రెండో టెస్టులో బరిలో దిగిన జడ్డూ.. భారత విజయంలో కీలక పాత్ర పోషించాడు.

ఇంగ్లాండ్‌తో తొలి రెండు టెస్టులకు ఇప్పటికే భారత జట్టును ప్రకటించారు. ఈ రెండు టెస్టులకు స్పిన్ ఆల్‌రౌండర్లు అక్షర్ పటేల్, వాషింగ్టన్ సుందర్‌లను ఎంపిక చేశారు.

తొలి రెండు టెస్టులకు భారత జట్టు: విరాట్ కోహ్లి (కెప్టెన్), రోహిత్ శర్మ, మయాంక్ అగర్వాల్, శుభమన్ గిల్, ఛటేశ్వర్ పుజారా, అజింక్య రహానే (వైస్ కెప్టెన్), కేఎల్ రాహుల్, హార్దిక్ పాండ్య, రిషబ్ పంత్ (వికెట్ కీపర్), సాహా (వికెట్ కీపర్), రవిచంద్రన్ అశ్విన్, కుల్దీప్ యాదవ్, అక్షర్ పటేల్, వాషింగ్టన్ సుందర్, ఇషాంత్ శర్మ, జస్ప్రీత్ బుమ్రా, మహమ్ద్ సిరాజ్, శార్దుల్ ఠాకూర్.