రాయుడిపై రెండు మ్యాచ్‌ల సస్పెన్షన్

ఫీల్డ్ అంపైర్లతో వాగ్వాదానికి దిగిన హైదరాబాద్ కెప్టెన్ అంబటి రాయుడిపై రెండు మ్యాచ్‌ల సస్పెన్షన్ వేటు పడింది. సయ్యద్ ముస్తాక్ అలీ టీ20 ట్రోఫీలో భాగంగా జనవరి 11న కర్ణాటకతో జరిగిన మ్యాచ్‌లో అంపైర్లతో రాయుడు దురుసుగా మాట్లాడాడు. దీంతో ఫీల్డ్ అంపైర్ల ఫిర్యాదు మేరకు అతనిపై భారత క్రికెట్ నియంత్రణ మండలి (బీసీసీఐ) చర్యలు తీసుకుంది. సస్పెన్షన్ కారణంగా ఫిబ్రవరి 5నుంచి జరగనున్న విజయ్ హజారే ట్రోఫీ‌లో తొలి రెండు మ్యాచ్‌లకి రాయుడు దూరం కానున్నాడు.

అసలేం జరిగిందంటే.. హైదరాబాద్ బౌలర్ మహ్మద్ సిరాజ్ విసిరిన బంతిని కర్ణాటక ఓపెనర్ కరుణ్ నాయర్ మిడ్‌వికెట్ దిశగా హిట్ చేశాడు. అక్కడే ఫీల్డింగ్ చేస్తున్న హసన్ బంతిని బౌండరీకి వెళ్లకుండా ఆపే ప్రయత్నంలో పొరపాటున బౌండరీ లైన్‌ను తొక్కేశాడు. కానీ.. ఫీల్డర్ తప్పుని ఫీల్డ్ అంపైర్ గమనించలేకపోవడంతో అప్పటికి కరుణ్ నాయర్ తీసిన రెండు పరుగులే కర్ణాటక స్కోరు బోర్డుకి కలిపారు. చివరికి కర్ణాటక జట్టు 20 ఓవర్లలో 5 వికెట్ల నష్టానికి 203 పరుగులు చేసింది.

హైదరాబాద్ జట్టు లక్ష్య ఛేదనకి దిగుతున్న సమయంలో ఫీల్డింగ్ కోసం మైదానంలోకి వచ్చిన కర్ణాటక కెప్టెన్ వినయ్ కుమార్.. ఫీల్డ్ అంపైర్‌కి అతను చేసిన పొరపాటును వివరించాడు. దీనిపై థర్డ్ అంపైర్‌తో చర్చించిన ఫీల్డ్ అంపైర్ రిప్లై‌లో చూసి కర్ణాటక స్కోరు బోర్డుకి మరో రెండు పరుగులు కలిపాడు. దీంతో హైదరాబాద్ టార్గెట్ 204 నుంచి 206‌కి పెరిగింది. టార్గెట్ పెంపుపై సహనం కోల్పోయిన అంబటి రాయుడు ఫీల్డ్ అంపైర్లతో వాగ్వాదానికి దిగాడు. మొదట నిర్ణయించిన 204 పరుగుల టార్గెట్‌తోనే హైదరాబాద్ ఆడుతుందని చెప్పాడు. రాయుడు వాదనతో దాదాపు పది నిమిషాల పాటు మ్యాచ్ ఆగిపోయింది. ఆ తర్వాత.. రాయుడు వెనక్కి తగ్గగా.. హైదరాబాద్ జట్టు నిర్ణీత 20 ఓవర్లలో 9 వికెట్ల నష్టానికి సరిగ్గా 203 పరుగులే చేయగలిగింది. రెండు పరుగులు కలపకుండా ఉండుంటే.. మ్యాచ్ టైగా ముగిసేది. అంపైర్లతో వాగ్వాదానికి దిగి.. రాయుడు క్రమశిక్షణ తప్పాడంటూ బీసీసీఐ తాజాగా అతనిపై చర్యలు తీసుకుంది.