ఆసీస్ జట్టులో కీలక మార్పు.. కమిన్స్ ఔట్

భారత్‌తో ఐదు వన్డేల సిరీస్‌లో వరుస పరాజయాలతో ప్రస్తుతం 3-0తో వెనకబడిన ఆస్ట్రేలియా.. కనీసం టీ20ల్లోనైనా గట్టిపోటీనిచ్చి సిరీస్‌ను చేజిక్కించుకోవాలని ఆశిస్తోంది. ఇందులో భాగంగా టీ20 జట్టులో కీలక మార్పు చేసింది. ఇప్పటికే ముగిసిన మూడు వన్డేల్లోనూ ఆశించిన మేర బంతితో రాణించలేకపోయిన ఫాస్ట్ బౌలర్ పాట్ కమిన్స్‌ని విశ్రాంతి పేరుతో పక్కన పెట్టి ఆండ్రూ టైని టీ20 జట్టులోకి తీసుకుంది. అక్టోబరు 7న తొలి టీ20, 10న రెండో టీ20, 13న హైదరాబాద్ వేదికగా మూడో టీ20 మ్యాచ్‌ జరగనుంది.

ఆస్ట్రేలియా తరఫున కేవలం ఐదు టీ20 మ్యాచ్‌లు మాత్రమే ఆడిన ఆండ్రూ టై.. ఈ ఏడాది ముగిసిన ఐపీఎల్‌లో గుజరాత్ లయన్స్ తరఫు మెరుగ్గా రాణించాడు. రైజింగ్ పుణె సూపర్ జెయింట్‌తో జరిగిన ఓ మ్యాచ్‌లో ఏకంగా హ్యాట్రిక్ వికెట్లు పడగొట్టి.. ఒంటిచేత్తో మ్యాచ్‌ని గెలిపించాడు. ఐపీఎల్‌‌‌లో ఆడటంతో భారత్‌ పిచ్‌లపై ఆండ్రూ టైకి మంచి అవగాహన ఉండటంతోనే అతడ్ని టీ20 జట్టులోకి తీసుకున్నట్లు తెలుస్తోంది. ఇటీవల భుజం గాయం నుంచి కోలుకున్న ఈ ఫాస్ట్ బౌలర్.. సిరీస్‌లో సత్తాచాటి ఆస్ట్రేలియా జట్టులో సుస్థిర స్థానం సంపాదించుకోవాలని ఉవ్విళ్లూరుతున్నాడు. నాలుగో వన్డే బెంగళూరు వేదికగా గురువారం జరగనుంది.