ఖేల్‌రత్న అవార్డుకి తెలుగు ఆర్చర్ జ్యోతి సురేఖ నామినేట్

ప్రతిష్ఠాత్మక క్రీడా పురస్కారం రాజీవ్‌ గాంధీ ఖేల్‌ రత్న అవార్డుకి తెలుగు ఆర్చర్ జ్యోతి సురేఖ నామినేట్ అయ్యింది. గత దశాబ్దకాలంగా ఇంటర్నేషనల్ లెవల్‌లో 33 పతకాలు సాధించిన సురేఖ పేరుని ఖేల్‌రత్న అవార్డు కోసం కేంద్ర క్రీడలు, యువజన వ్యవహారాల మంత్రిత్వ శాఖకి ఆంధ్రప్రదేశ్ ప్రభుత్వం తాజాగా పంపింది. సురేఖతో పాటు యతిమరపు రజని (హాకీ) పేరుని అర్జున అవార్డు కోసం, భాస్కర్ బాబు (బ్యాడ్మింటన్) పేరుని ద్రోణాచార్య అవార్డు కోసం ఏపీ ప్రభుత్వం సిఫార్సు చేసింది.

ఆర్చరీలో సురేఖ సాధించిన 33 మెడల్స్‌లో 9 బంగారు, 13 రజతం, 11 కాంస్య పతకాలు ఉన్నాయి. ఇందులో ఏడు పతకాలు వరల్డ్‌‌కప్స్‌లో సాధించగా.. మూడు వరల్డ్‌ ఛాంపియన్‌షిప్‌లో, రెండేసి పతకాలు జూనియర్ వరల్డ్‌కప్, దక్షిణ ఆసియా గేమ్స్‌లో గెలిచినవి. ఇక గత కొంతకాలంగా భారత ఆర్చరీ టీమ్‌ని నెం.1 స్థానంలో నిలపడంలో క్రియాశీలక పాత్ర పోషిస్తున్న సురేఖకి.. 2017లోనే అర్జున అవార్డు వరించింది.

2019 వరల్డ్‌ ఛాంపియన్‌షిప్‌లో వ్యక్తిగతంగా పతకం గెలిచిన తొలి భారత మహిళా ఆర్చర్‌గా రికార్డు నెలకొల్పిన జ్యోతి సురేఖ.. ఇప్పుడు కెరీర్‌లోనే అత్యుత్తమ దశలో కొనసాగుతోంది.