యాషెస్: తొలి టెస్టులో ఆసీస్ ఘనవిజయం

ప్రతిష్టాత్మక యాషెస్ సిరీస్‌‌ను ఆతిథ్య ఆస్ట్రేలియా జట్టు అద్భుత విజయంతో ఆరంభించింది. బ్రిస్బేన్‌లో జరిగిన తొలి టెస్టులో ఇంగ్లండ్‌పై 10 వికెట్ల తేడాతో ఘన విజయం సాధించింది. 170 పరుగుల లక్ష్యాన్ని ఒక్క వికెట్ కూడా కోల్పోకుండా సునాయాసంగా ఛేదించింది. రెండో ఇన్సింగ్స్‌లో 114/0 ఓవర్‌నైట్ స్కోరుతో ఐదోరోజు ఆట ఆరంభించిన కంగారూ ఓపెనర్లు.. సుమారు గంట వ్యవధిలో 56 పరుగులు జోడించి జట్టుకు విజయాన్ని అందించారు. డేవిడ్ వార్నర్ (119 బంతుల్లో 87) కాస్త దూకుడుగా ఆడాడు. అతనికి కేమరాన్ బ్యాన్‌క్రాఫ్ట్ (182 బంతుల్లో 82) మంచి సహకారం అందించాడు.

వార్నర్-బ్యాన్‌క్రాఫ్ట్ జోడీని విడదీయడానికి ఇంగ్లండ్ బౌలర్లు చేసిన ప్రయత్నాలు ఫలించలేదు. వీరిద్దరూ ఎంతో ఆత్మవిశ్వాసంతో ఆడి జట్టును గెలిపించారు. తొలి ఇన్నింగ్స్‌లో 141 పరుగులు సాధించిన ఆస్ట్రేలియా కెప్టెన్ స్టీవ్ స్మిత్ ‘మ్యాన్ ఆఫ్ ది మ్యాచ్’ అవార్డు దక్కించుకున్నాడు. సిరీస్‌లో భాగంగా ఇరు జట్ల మధ్య రెండో టెస్టు డిసెంబరు 2న ఆడిలైట్‌లో ప్రారంభమవుతుంది. ఇది డే-నైట్ టెస్ట్. ఇదిలా ఉంటే.. సిడ్నీలో మ్యాచ్ ఆడుతూ తలకు బాల్ తగిలి మరణించిన ఆసీస్ ఆటగాడు ఫిలిప్ హ్యూస్ మూడో వర్థంతి నాడు ఆస్ట్రేలియా యాషెస్ తొలి టెస్టును గెలవడం గమనార్హం.

స్కోరు వివరాలు:
ఆస్ట్రేలియా - 328/10 & 173/0
ఇంగ్లండ్ - 302/10 & 195/10