మన అశ్విన్ మళ్లీ నెం.1 అయ్యాడోచ్..!

భారత ఆఫ్ స్పిన్నర్ రవిచంద్రన్ అశ్విన్ మళ్లీ ఐసీసీ నెం.1 ఆల్‌రౌండర్ పీఠాన్ని దక్కించుకున్నాడు. ఫిబ్రవరి 23 నుంచి
ఆస్ట్రేలియాతో పుణె వేదికగా జరిగిన తొలి టెస్టులో బంతితో రాణించిన అశ్విన్.. బ్యాట్‌తో మాత్రం రెండు ఇన్నింగ్స్‌లోనూ విఫలమయ్యాడు. దీంతో అతను నెం.1 ర్యాంక్‌ను బంగ్లాదేశ్ ఆల్‌రౌండర్ షకిబ్ అల్ హసన్‌కి కోల్పోవాల్సి వచ్చింది. అయితే గతవారం శ్రీలంకతో ముగిసిన తొలి టెస్టులో షకిబ్ మూడు వికెట్లు పడగొట్టి 31 పరుగులు మాత్రమే చేయగలిగాడు. దీంతో
ఐసీసీ ​ సోమవారం ప్రకటించిన ర్యాంకింగ్స్‌లో అతను రెండో స్థానానికి పడిపోగా.. బెంగళూరు టెస్టులో 8 వికెట్లు పడగొట్టి సిరీస్‌లో మొత్తం 15 వికెట్లతో రాణించిన అశ్విన్‌ నెం.1 ర్యాంక్‌ని తిరిగి అందుకోగలిగాడు.

ప్రస్తుతం ఐసీసీ టెస్టు బౌలర్ల ర్యాంకింగ్స్‌లో రవీంద్ర జడేజాతో కలిసి నెం.1 స్థానాన్ని పంచుకుంటున్న అశ్విన్ చెంత ​ నెం.1 ఆల్‌రౌండర్ ర్యాంక్ కూడా కొంతకాలం స్థిరంగా నిలిచే అవకాశం ఉంది. ప్రస్తుతం అశ్విన్ 434 పాయింట్లతో అగ్రస్థానంలో దూసుకెళ్తుండగా.. షకిబ్ 403 పాయింట్లతో ద్వితీయ స్థానంలో ఉన్నాడు. గురువారం నుంచి రాంచీ వేదికగా ఆస్ట్రేలియాతో మూడో టెస్టు ఆరంభంకానుంది. బెంగళూరులో ఆసీస్‌ టాప్ ఆర్డర్‌ను పేకమేడలా కూల్చిన అశ్విన్ ప్రస్తుతం ఫుల్ జోష్‌లో ఉన్నాడు. రాంచీలో ఆస్ట్రేలియా అతణ్ని అడ్డుకోవడం శక్తికి మించిన పనే..!