భారత్‌పై శతకం బాదిన లిటన్ దాస్..!

దుబాయ్ వేదికగా భారత్‌తో జరుగుతున్న ఆసియా కప్ ఫైనల్ మ్యాచ్‌లో బంగ్లాదేశ్ ఓపెనర్ లిటన్ దాస్ శతకంతో చెలరేగాడు. మ్యాచ్ ఆరంభం నుంచి దూకుడుగా ఆడిన దాస్ కేవలం 87 బంతుల్లోనే 11x4, 2x6 సాయంతో 100 పరుగుల మైలురాయిని అందుకున్నాడు. వన్డే కెరీర్‌లో లిటన్ దాస్‌కి ఇదే తొలి శతకంకాగా.. టోర్నీలో భారత్‌పై శతకం సాధించిన రెండో క్రికెటర్‌గా రికార్డుల్లో నిలిచాడు.

టోర్నీ ఆరంభం నుంచి పేలవ ఫామ్‌తో విమర్శలు ఎదుర్కొన్న లిటన్ దాస్ ఫైనల్లో జూలు విదిల్చాడు. తొలి పవర్‌ ప్లేలోనే భారీ షాట్లతో చెలరేగిన దాస్.. మరో ఓపెనర్ హసన్ (32: 59 బంతుల్లో 3x4)తో కలిసి తొలి వికెట్‌కి 20.5 ఓవర్లలోనే 120 పరుగుల భాగస్వామ్యం నెలకొల్పాడు. ఈ దశలో హసన్ ఔటవగా.. అనంతరం వచ్చిన ఇమ్రూల్ (2), ముష్ఫికర్ (5), మహ్మద్ మిథున్ (2) పేలవరీతిలో వరుసగా పెవిలియన్ చేరిపోయారు. అయినప్పటికీ పట్టుదలతో బ్యాటింగ్ చేసిన లిటన్ దాస్.. కెరీర్‌లో తొలి శతకాన్ని నమోదు చేసుకున్నాడు. అతని జోరుతో 32 ఓవర్లు ముగిసే సమయానికి బంగ్లాదేశ్ 150/4తో కొనసాగుతోంది. దాస్‌కి తోడుగా క్రీజులో మహ్మదుల్లా (4) ఉన్నాడు.