షకీబ్‌ని ఊరించి బోల్తా కొట్టించిన జడేజా

భారత స్పిన్నర్ రవీంద్ర జడేజా‌ పునరాగమనంలో అదరగొడుతున్నాడు. ఏడాది తర్వాత మళ్లీ వన్డే జట్టులో చోటు సంపాదించుకున్న ఈ ఆల్‌రౌండర్.. ఆసియా కప్‌లో భాగంగా ఈరోజు బంగ్లాదేశ్‌తో జరుగుతున్న మ్యాచ్‌లో వేసిన తొలి ఓవర్‌లోనే వికెట్ పడగొట్టాడు.

ఇన్నింగ్స్‌ 10వ ఓవర్‌లో బౌలింగ్‌కి వచ్చిన రవీంద్ర జడేజా‌కి వరుసగా రెండు ఫోర్లు బాది బంగ్లాదేశ్ బ్యాట్స్‌మెన్ షకీబ్ అల్ హసన్ ‌ (17: 12 బంతుల్లో 3x4) సవాల్ విసిరాడు. దీంతో.. ఫీల్డింగ్‌లో కొద్దిగా మార్పులు చేయాల్సిందిగా కెప్టెన్ రోహిత్ శర్మకి సూచించిన జడేజా మూడో బంతిని ఊరిస్తూ స్వీప్‌షాట్‌ కోసం షకీబ్‌ని ఉసిగొల్పాడు.

బంతి ఊహించినట్లు రావడంతో.. రెండో ఫోర్ కొట్టిన తరహాలోనే షకీబ్ హ్యాట్రిక్ ఫోర్స్ కోసం స్వీప్ షాట్ ఆడగా.. ఫీల్డింగ్ మార్పుతో లెగ్ అంపైర్‌ పక్కకి వచ్చిన ధావన్.. చక్కగా క్యాచ్ అందుకున్నాడు. ఆ తర్వాత కొద్దిసేపటికే జడేజా బౌలింగ్‌లోనే మహ్మద్ మిథున్ (9) కూడా ఔటయ్యాడు. దీంతో.. 17 ఓవర్లు ముగిసే సమయానికి బంగ్లాదేశ్ 63/4తో నిలిచింది.