పసిడి పతక విజేత ‘స్వప్న’కి స్పెషల్ షూస్

ఇండోనేషియా వేదికగా ఇటీవల ముగిసిన ఆసియా గేమ్స్‌లో పసిడి పతకంతో మెరిసిన స్వప్న బర్మన్‌‌‌ కోసం స్పోర్ట్స్ అథారిటీ ఆఫ్ ఇండియా (ఎస్‌ఏఐ) స్పెషల్ షూస్‌ని తయారు చేయిస్తోంది. నిరుపేద కుటుంబం నుంచి వచ్చి.. ప్రతికూల పరిస్థితుల్లోనూ ఏడు ఈవెంట్లు కలిపి ఉన్న‘హెప్టాథ్లాన్‌’‌లో పోటీపడిన స్వప్న.. బంగారు పతకంతో భారత్‌ని మురిపించింది.

ఆమె రెండు కాళ్లకి ఒక అదనపు వేలు ఉన్నా.. ప్రత్యేక బూట్లని తయారు చేయించుకునే ఆర్థిక స్థోమత లేకపోవడంతో సాధారణ బూట్లనే ధరించి పోటీలో పాల్గొని పోరాట పటిమని చూపింది. దీంతో విషయం తెలుసుకున్న కేంద్ర క్రీడల మంత్రి రాజ్యవర్ధన్ సింగ్ రాథోడ్ వెంటనే స్వప్నకి ప్రత్యేక షూస్‌ తయారు చేయించడంపై దృష్టి సారించాలని అధికారులను ఆదేశించినట్లు ఎస్‌ఏఐ డైరెక్టర్ జనరల్ నీలమ్ కపూర్ తెలిపారు.

‘స్వప్న షూస్ సమస్య గురించి తెలిసిన వెంటనే క్రీడల మంత్రి ఇండోనేషియా నుంచి మాకు ఆదేశాలు జారీ చేశారు. దీంతో.. ప్రత్యేక షూస్ రూపొందించడంపై అడిడాస్ కంపెనీని మేము సంప్రదించగా.. వారు అంగీకరించారు’ అని నీలమ్ కపూర్ తాజాగా వెల్లడించారు.

ఆసియా గేమ్స్ కంటే ముందే స్వప్న సమస్య గురించి ఎస్‌ఏఐకి తాను వెల్లడించినా పట్టించుకోలేదని.. తాజాగా మంత్రి ఆదేశాలు జారీ చేయడంతో కదలిక వచ్చిందని స్వప్న కోచ్ శంకర్ చెప్పుకొచ్చాడు. ఇటీవల షూస్ సైజ్, డిజైన్ గురించి ఎస్‌ఏఐ టీమ్‌ తనని సంప్రదించినట్లు కూడా ఆయన వివరించారు.