AUS vs IND: యుజువేంద్ర చాహల్ చెత్త రికార్డ్.. భారత స్పిన్ చరిత్రలోనే..

సిడ్నీ వేదికగా ఆస్ట్రేలియాతో జరిగిన తొలి వన్డేలో భారత్ 66 పరుగుల తేడాతో ఓడింది. ముందుగా బ్యాటింగ్ చేసిన ఆస్ట్రేలియా 6 వికెట్ల నష్టానికి 377 పరుగుల భారీ స్కోరు చేయగా.. బదులుగా భారత్ 8 వికెట్ల నష్టానికి 308 పరుగులే చేయగలిగింది. ఈ మ్యాచ్‌లో వార్నర్-ఫించ్ తొలి వికెట్‌కు 156 పరుగులు జోడించగా.. స్మిత్ 62 బంతుల్లోనే సెంచరీ సాధించాడు. మ్యాక్స్‌వెల్ 19 బంతుల్లోనే 45 రన్స్ చేశాడు.

స్మిత్, మ్యాక్సీ దెబ్బకు భారత స్పిన్నర్ యుజువేంద్ర చాహల్ పది ఓవర్లలో ఒకే వికెట్ తీసి 89 రన్స్ సమర్పించుకున్నాడు. వన్డేల్లో భారత స్పిన్నర్ ఈస్థాయిలో పరుగులు ఇవ్వడం ఇదే తొలిసారి కావడం గమనార్హం. 2019 వరల్డ్ కప్‌లో ఎడ్జ్‌బస్టన్ వేదికగా ఇంగ్లాండ్‌‌తో జరిగిన మ్యాచ్‌లో చాహల్ 88 రన్స్ ఇచ్చుకున్నాడు. సిడ్నీ వన్డేలో ఒక్క పరుగు అదనంగా ఇచ్చుకున్న చాహల్ తన పేరిట ఉన్న చెత్త రికార్డును తిరగరాసుకున్నాడు.

వన్డేల్లో అత్యధిక పరుగులు ఇచ్చుకున్న భారత స్పిన్నర్ల జాబితాలో పియూష్ చావ్లా మూడో స్థానంలో ఉన్నాడు. 2008లో మిర్పూర్‌లో పాకిస్థాన్‌తో జరిగిన మ్యాచ్‌లో చావ్లా 85 రన్స్ ఇచ్చుకున్నాడు.

సిడ్నీ వన్డేలో చాహల్.. మార్కస్ స్టోయినిస్‌ను డకౌట్‌గా పెవిలియన్ చేర్చాడు. కానీ మ్యాక్స్‌వెల్‌ ముందు మాత్రం తేలిపోయాడు. చాహల్ వేసిన 43 ఓవర్లో మ్యాక్సీ రెండు సిక్సులు ఓ ఫోర్ బాదాడు. మరో స్పిన్నర్ రవీంద్ర జడేజా వికెట్లేమీ తీయకుండా పది ఓవర్లలో 63 రన్స్ ఇచ్చుకున్నాడు. నవదీప్ సైనీ 89 పరుగులు ఇవ్వగా.. బుమ్రా 73 రన్స్ ఇచ్చుకున్నాడు. షమీ 59 రన్స్ ఇచ్చి 3 వికెట్లు తీశాడు. ఆస్ట్రేలియా స్పిన్నర్ జంపా 10 ఓవర్లలో 54 పరుగులిచ్చి 4 వికెట్లు పడగొట్టాడు.