David Warner తర్వాత ఫించే.. ఆసీస్ కెప్టెన్ అరుదైన రికార్డ్

సిడ్నీ వేదికగా భారత్‌తో జరుగుతున్న తొలి వన్డేలో ఆరోన్ ఫించ్ అరుదైన రికార్డ్ క్రియేట్ చేశాడు. బుమ్రా వేసిన ఇన్నింగ్స్ 5.5వ ఓవర్లో సింగిల్ తీసి 17 రన్స్ చేసిన ఫించ్.. వన్డేల్లో 5000 పరుగుల క్లబ్‌లో చేరాడు. ఆస్ట్రేలియా తరఫున వేగంగా ఐదు వేల రన్స్ చేసిన రెండో ఆటగాడు ఫించ్ కావడం గమనార్హం. ఫించ్‌ 126 ఇన్నింగ్స్‌ల్లో 5 వేల రన్స్ మైలురాయిని అందుకున్నాడు. మరో ఓపెనర్ డేవిడ్ వార్నర్ 115 ఇన్నింగ్స్‌ల్లోనే ఐదు వేల పరుగులు చేశాడు.

డీన్ జోన్స్ 128 ఇన్నింగ్స్‌ల్లో.. మాథ్యూ హెడెన్ 132 ఇన్నింగ్స్‌ల్లో... మైకెల్ బెవాన్ 135 ఇన్నింగ్స్‌ల్లో 5 వేల పరుగులు చేశారు. ఆస్ట్రేలియా తరఫున 5000 రన్స్ చేసిన 16వ ఆటగాడు ఫించ్ కావడం గమనార్హం. ఆస్ట్రేలియా తరఫున రిక్కీ పాంటింగ్ (364 ఇన్నింగ్స్‌ల్లో 13,589 రన్స్) టాప్ స్కోరర్‌గా కొనసాగుతున్నాడు.

సిడ్నీ వన్డేల్లో 38 పరుగుల వద్ద ఔటయ్యే ప్రమాదాన్ని ఫించ్ తప్పించుకున్నాడు. చాహల్ విసిరిన వైడ్ డెలివరీని వెంటాడిన ఫించ్.. బంతిని గాల్లోకి లేపాడు. శిఖర్ ధావన్ క్యాచ్ అందుకునేందుకు ముందుకు దూకినప్పటికీ.. బంతి అతడికి అందలేదు. కాసేపటికే ఫించ్ హాఫ్ సెంచరీ పూర్తి చేసుకోగా.. ఆస్ట్రేలియా 19 ఓవర్లలో వికెట్ నష్టపోకుండా 100 పరుగులు చేసింది.