IND vs AUS: ఆసీస్ ఆల్‌రౌండర్‌కు గాయం.. రెండో వన్డే నుంచి ఔట్!

తొలి వన్డేలో గెలిచిన ఉత్సాహంలో ఉన్న ఆస్ట్రేలియాకు గాయం రూపంలో షాక్ తగిలింది. ఆ జట్టు ఆల్‌రౌండర్ మార్కస్ స్టోయినిస్ గాయం బారిన పడ్డాడు. దీంతో రెండో వన్డేలో అతడు బరిలో దిగడం అనుమానంగా మారింది. భారత్ లక్ష్య చేధనలో ఉండగా.. ఏడో ఓవర్ రెండో బంతిని విసిరిన తర్వాత స్టోయినిస్‌ను నొప్పి బాధించింది. దీంతో స్టోయినిస్ మైదానాన్ని వీడగా.. మ్యాక్స్‌వెల్ ఆ ఓవర్ పూర్తి చేశాడు.

క్రికెట్.కామ్.ఏయూ వెల్లడించిన వివరాల ప్రకారం స్టోయినిస్‌కు ఎడమ భాగంలో నొప్పిగా ఉన్నట్లు తెలుస్తోంది. గాయం తీవ్రతను తెలుసుకోవడం కోసం స్కానింగ్ చేయనున్నారు. స్టోయినిస్ గాయం కారణంగా రెండో వన్డేకు దూరమైతే.. ఆల్‌రౌండర్లు కామెరాన్ గ్రీన్, మోయిసిస్ హెన్రిక్యూస్‌ల్లో ఒకరు రెండో వన్డే ఆడే అవకాశం ఉంది.

స్టోయినిస్ ఎలా ఉన్నాడో తాను చూడలేదన్న స్మిత్.. అతడి బదులు మరొకరు ఆడాల్సి వస్తే కామెరాన్ గ్రీన్ ఆడొచ్చని తెలిపాడు. షెఫీల్డ్ షీల్డ్ టోర్నీలో గ్రీన్ ఆల్‌రౌండర్‌గా రాణించాడు. ఐపీఎల్ 2020లో ఢిల్లీ క్యాపిటల్స్ తరఫున ఆడిన స్టోయినిస్.. ఆ జట్టు ఫైనల్ చేరడంలో కీలక పాత్ర పోషించాడు. సన్‌రైజర్స్‌తో జరిగిన రెండో క్వాలిఫైయర్ మ్యాచ్‌లో ఆల్‌రౌండర్‌గా అదరగొట్టాడు.