IND vs AUS: హార్దిక్ పోరాటం వృథా.. 66 పరుగుల తేడాతో ఆసీస్ విజయం

సిడ్నీ వేదికగా జరిగిన తొలి వన్డేలో భారత్‌పై ఆస్ట్రేలియా 66 పరుగుల తేడాతో ఘన విజయం సాధించింది. టాస్ గెలిచి ముందుగా బ్యాటింగ్ చేసిన ఆస్ట్రేలియా 50 ఓవర్లలో 6 వికెట్ల నష్టానికి 374 పరుగుల భారీ స్కోరు సాధించగా.. బదులుగా భారత్ 8 వికెట్ల నష్టానికి 308 పరుగులకే పరిమితమైంది. 375 పరుగుల భారీ లక్ష్యంతో బరిలోకి దిగిన టీమిండియాకు ఓపెనర్లు ధావన్ (74), మయాంక్ అగర్వాల్ (22) మెరుపు ఆరంభం ఇచ్చారు. వీరిద్దరూ 5.2 ఓవర్లలోనే తొలి వికెట్‌కు 53 పరుగులు జోడించారు.

ఈ దశలో చెలరేగిన హేజిల్‌వుడ్ మయాంక్‌ను ఔట్ చేయడంతోపాటు.. ఇన్నింగ్స్ పదో ఓవర్లో మూడు బంతుల వ్యవధిలో కోహ్లి (21), అయ్యర్ (2)లను పెవిలియన్ చేర్చాడు. ఐదోస్థానంలో బ్యాటింగ్‌కు దిగిన కేఎల్ రాహుల్‌ (12)ను ఆడమ్ జంపా పెవిలియన్ చేర్చాడు. దీంతో భారత్ 13.3 ఓవర్లలో 4 వికెట్లు నష్టపోయి 104 రన్స్ చేసింది.

భారత్ కష్టాల్లో పడిన దశలో శిఖర్ ధావన్‌తో జత కలిసిన హార్దిక్ పాండ్య ఆచితూచి ఆడుతూ.. వీలు చిక్కినప్పుడల్లా బౌండరీలు, సిక్సులు బాదాడు. వీరిద్దరూ ఐదో వికెట్‌కు 128 పరుగులు జోడించారు. ధావన్‌ను ఔట్ చేసిన జంపా.. ప్రమాదకరంగా మారుతున్న ఈ జోడిని విడదీశాడు. కాసేపటికే హార్దిక్ పాండ్య (76 బంతుల్లో 90 రన్స్; 7x4, 4x6) ఔటవడంతో భారత్ ఓటమి ఖాయమైంది. రవీంద్ర జడేజా (37 బంతుల్లో 25) దూకుడుగా ఆడలేకపోయాడు.

అంతకు ముందు టాస్ గెలిచి ముందుగా బ్యాటింగ్ ఎంచుకున్న ఆస్ట్రేలియాకు ఓపెనర్లు వార్నర్ (62), ఫించ్ (112) శుభారంభం ఇచ్చారు. వీరిద్దరూ తొలి వికెట్‌కు 156 రన్స్ జోడించారు. మూడో స్థానంలో బ్యాటింగ్‌కు దిగిన స్టీవ్ స్మిత్ 62 బంతుల్లోనే సెంచరీ బాదాడు. ఐపీఎల్‌లో రాణించలేకపోయిన మ్యాక్స్‌వెల్ 19 బంతుల్లోనే 45 రన్స్‌ చేశాడు. దీంతో ఆస్ట్రేలియా 6 వికెట్ల నష్టానికి 374 పరుగులు చేసింది.

ఆస్ట్రేలియా బౌలర్లలో హేజిల్‌వుడ్ 55 పరుగులిచ్చి 3 వికెట్లు తీయగా.. స్పిన్నర్ ఆడమ్ జంపా 54 పరగులిచ్చి 4 వికెట్లు పడగొట్టాడు. భారత బౌలర్లలో షమీ 59 రన్స్ ఇచ్చి 3 వికెట్లు తీశాడు. బుమ్రా, సైనీ, చాహల్ తలో వికెట్ తీశారు. కానీ చాహల్ 10 ఓవర్లలో ఏకంగా 89 రన్స్ ఇచ్చుకున్నాడు. బౌలర్లు వికెట్లు తీయలేకపోవడం.. ఫీల్డింగ్ తప్పిదాలతో భారత్ భారీ మూల్యం చెల్లించుకుంది.