బంగ్లాతో మ్యాచ్‌ని రద్దు చేసుకున్న ఆస్ట్రేలియా

సుదీర్ఘకాలం తర్వాత బంగ్లాదేశ్‌లో పర్యటిస్తున్న ఆస్ట్రేలియా జట్టు ఆదిలోనే ఆతిథ్య దేశానికి షాకిచ్చింది. ఫతుల్లా వేదికగా బంగ్లాదేశ్‌తో మంగళవారం జరగాల్సిన రెండు రోజుల ప్రాక్టీస్ మ్యాచ్‌ని రద్దు చేసుకున్నట్లు ఆస్ట్రేలియా ప్రకటించింది. గత కొద్దిరోజుల నుంచి బంగ్లాదేశ్‌లో వర్షాలు కురుస్తున్నాయి. సోమవారం కూడా ఎడతెరపిలేని వర్షం కారణంగా ఫతుల్లా మైదానం చిత్తడిగా మారింది. అయితే.. మరో స్టేడియం సిద్ధం చేస్తామని బంగ్లాదేశ్ క్రికెట్ బోర్డు చెప్పినా.. భద్రతా కారణాల
దృష్ట్యా ఆస్ట్రేలియా జట్టు నిరాకరించింది.

‘మ్యాచ్‌ని నిర్వహించాలని బంగ్లాదేశ్ క్రికెట్ బోర్డు అన్ని ఏర్పాట్లు చేసింది. కానీ.. వర్షం వారి ఆశల్ని వమ్ముచేసింది. ఢాకా‌‌లో ఆసీస్ జట్టు కోసం అన్ని సౌకర్యాలు కల్పించారు. దేశంలోని చాలా ప్రాంతాల్లో వర్షం కారణంగా చాలా మంది ప్రజలు తీవ్ర ఇబ్బందులు పడుతున్నట్లు తెలిసి చాలా బాధేసింది’ అని ఆస్ట్రేలియా కోచ్ డారెన్ లీమన్ వెల్లడించాడు. 2006 నుంచి భద్రత కారణాలతో ఆస్ట్రేలియా జట్టు బంగ్లాదేశ్‌లో పర్యటించలేదు. ఈ రెండు జట్ల మధ్య ఆగస్టు 27 నుంచి రెండు టెస్టుల సిరీస్‌లో ఆరంభంకానుంది.